Zyrtarët më të lartë kanë filluar bisedimet me Fondin Monetar Ndërkombëtar, sindikatat dhe punëdhënësit mbi një buxhet kursimesh ku mund të përfshihet ulja e pensioneve dhe e pagave për sektorin publik.
Zyrtarë të qeverisë së Serbisë takuan përfaqësues të Fondit Monetar Ndërkombëtar të hënën për të diskutuar masa kursimesh që do të përfshihen në buxhetin e rishikuar 2014-15 i cili do të dërgohet për miratim në parlament më 15 shtator.
Ministri i financave të Serbisë Dusan Vujovic tha se qeveria do të njoftojë pas takimit nëse do të ulë pagat dhe pensionet dhe në çfarë mase do t’i ulë, por vendimi final do të merret javën e ardhshme.
Qeveria po mendon nëse duhet të reduktojë pensionet në tërësi apo të ulë vetëm pensionet e larta në mënyrë që të mbrojë pensionistët me të ardhura të ulëta.
Kur vjen puna te pagat e sektorit publik, zyrtarët po diskutojnë gjithashtu nëse është më mirë të shkurtojnë të gjitha pagat apo të vendosin ulje progresive. Në Serbi ka 780 mijë të punësuar në sektorin publik.
Kjo do të thotë se pagat më të larta se 30 mijë dinarë (250 euro) apo 45 mijë dinarë (378 euro) do të reduktohen me 10 për qind ndërsa pagat më të larta se 80 mijë dinarë (672 euro) do të reduktohen me 15 për qind ndërsa ato më të larta se 145 mijë dinarë (1,200 euro) do të reduktohen me 20 për qind.
Zyrtarët nuk kanë vendosur ende nëse do të përjashtojnë pagat nën 250 euro nga uljet apo jo.
Televizioni publik i Serbisë RTS raportoi se qeveria dhe përfaqësuesit e FMN-së ranë dakord që masat e kursimit duhet të kenë pranueshmëri të gjerë shoqërore në mënyrë për t’u siguruar që do të jenë të qëndrueshme.
Të dy palët ranë dakord gjithashtu që paketat e kursimeve duket të përfshijnë masa për të mbrojtur më të varfrit.
“Ne duam të kapërcejmë problemet dhe të ndërmarrim të gjitha reformat e nevojshme në mënyrë që të kemi një vend normal dhe të shëndetshëm brenda dy apo tri viteve. Ne do të përpiqemi të sigurojmë që asnjë dramatike nuk do të ndodhë dhe që më të varfrit të jenë absolutisht të mbrojtur,” deklaroi kryeministri i Serbisë Aleksandar Vucic para takimit.
Vucic qe takuar më herët me përfaqësues të sindikatave dhe të Federatës së Punëdhënësve të Serbisë për të diskutuar masat e propozuara.
