Ankesat nga komshinjtë çuan në mbylljen e një kafeneje që shërbente në të njëjtën kohë si kopësht për kafshë shtëpiake, ankohet pronarja.
“Dëgjova që do e mbyllësh fare. Seriozisht e ke? Na fike,” ankohet Franscesca Pampaloni, diplomate pranë Komisionit Europian në Tiranë dhe kliente e rregullt e Animal Home Riva Bar.
Autoritet e shëndetit publik në Tiranë kanë pezulluar aktivitetin e kafenesë që gjithashtu shërbente si kopësht për kafshë shtëpiake në lagjen 21 dhjetori, me arsyetimin që njerëz dhe kafshë nuk mund të qëndrojnë në një ambient së bashku.
Pas katër inspektimesh të njëpasnjëshme, Drejtoria e Shëndetit Publik në Tiranë,DSHP, ka urdhëruar pezullim e aktivitetit të Animal Home Riva Bar, edhe pse baza ligjore për një vendim të tillë mbetet e paqartë.
Megjithatë, pronarja e kafenesë ankohet, që vendimi i DSHP-së është i padrejtë dhe erdhi pas ankeseva që vinin nga dy biznese ngjitur.
“Njëri ankohet se gjase këtu mblidhen shumë qen dhe bëhet zhurmë,” shpjegon Geranda Gjeta, e cila e ka filluar aktivitetin e saj një vit e gjysmë më parë.
“Ndërsa tjetra i ka fobi kafshët dhe nuk do të jetë e rrethuar me një ambient të tillë, ndonëse të gjithë kafshët këtu vijnë me të zotët dhe nuk ekziston asnjë kontakt me personat e tjerë,” shton ajo.
Kontaktuar nga BIRN një juriste për DSHP, pretendoj që të qëndroj hapur një biznes i tillë duke të ketë tre licenca të ndryshme, një si kafene, një si kopësht për kafshë dhe një tjetër si dyqan kafshësh, megjithëse diçka e tillë nuk kërkohet nga Qendra Kombëtare e Regjistrimit, QKR.
Gjeta shpjegon që ideja për të hapur kopshtin i erdhi pasi i dhuruan qenushin e saj Riva, dhe kuptoi që në shumë ambiente publike në Tiranë, bare dhe kafene, kafshët nuk lejoheshin brenda.
Ajo shton që gjatë sezonit të verës pronarë të qenve apo maceve përballen me vështirësinë e gjetjes së një vendstrehimi në rast pushimesh jashtë vendit, gjë që shpesh i shtyn ato ti braktisin.
Bashkia e Tiranës nuk ka një strehëz për kafshët e braktisura, dhe shumë herë në të kaluarën, zgjidhja konvencionalë, në mënyrë të veçantë për qentë e rrugës, ka qenë vrasja e tyre.
“Kështu më lindi ideja për të qenë unë e para e të hap një vend ku të vijnë miqtë tanë me katër këmbë për tu argëtuar, jo vetëm njerëzit,” Gjeta shprehet.
“Po ja që nuk të fërkojnë të gjithë krahët, edhe kur je me të drejtën tënde,” përfundon ajo.
