Dokumentari i cili tregon hapur historinë e lëvizjes LGBT në Shqipëri është nderuar me çmimin e parë në Festivalin Ballkanik të Filmit dhe Kulinarisë, B3F.
‘SkaNdal’ u përzgjodh si më i miri ndërmjet 20 filmave dokumentarë në konkurrim në edicionin e katërt të festivalit i cili mbahet në qytetin e Pogradecit.
Kristi Pinderi, drejtues i organizatës Pro LGBT, dhe njëkohësisht protagonist dhe skenarist i filmit, shprehet se sinqeriteti që e karakterizon dokumentarin rezonojë me publikun e B3F.
“Ajo që mua më pëlqen nga filmi është fakti që ne [personat LGBT] nuk qahemi, por i tregojmë të gjitha ngjyrat; edhe të errëta, edhe gri edhe ato optimiste,” thotë ai.
“Skandal për mua është një dëshmi fitoreje dhe filmi duhet shfaqur sa më shumë në mënyrë që pjesa e fshehur e komunitetit [LGBT] të inkurajohet,” shtoi ai.
Skandal është dokumentari i parë me metrazh të gjatë për lëvizjen LGBT në Shqipëri, ku pjesëtarë të këtij komuniteti flasin hapur për orientimin seksual duke thyer tabutë e shoqërisë shqiptare.
Me regji të Elton Baxhakut dhe Eriona Camit dhe skenar të Kristi Pinderit dhe Xheni Karajt, ‘SkaNdal’ ishte i pari dokumentar shqiptar që këtë vit (2014) u përzgjodh në konkurrimin zyrtar të edicionit të 20-të të Festivalit të Filmit në Sarajevë.
Ai ishte ndër filmat dokumentarë më të votuar nga audienca, ndërkohë që fitoi vëmendjen e shumë mediave lokale dhe ndërkombëtare, përfshirë një kritikë nga gazeta e franceze ‘Le Monde’, që e cilësoi atë “një dokumentar emocionues”.
Regjizori Baxhaku shprehet se dokumentari zë fill në dëshirën për të dokumentuar daljen hapur të pjesëtarëve të komunitetit LGBT.
“Mbaj mend që shpesh i thoja Xheni Karaj që ta ndiqja me kamera kur të bënte ‘comming out’ në familje … [dhe] në një natë “të bukur vere” ajo e bëri këtë në një televizion kombëtar,” thotë Baxhaku.
“Pasi Xheni dhe Kristi kishin parë një punë tonën të zhanrit dokumentar më kontaktuan dhe më shprehën që kishin një ide për të bërë një dokumentar,” shtoi ai.
Në edicionin e katërt të festivalit B3F konkurruan këtë vit mbi 70 filma nga Serbia, Kroacia, Maqedonia, Kosova, Mali i Zi, Rumania, Bosnja dhe Hercegovina, Greqia, Shqipëria, etj.
