Bukureshti thotë se nuk do të ketë probleme nga pakësimet e furnizimeve me gaz duke premtuar se konsumatorët e saj nuk do të preken.
Gjigandi rus i energjisë Gazprom do të pakësojë furnizimin me gaz të Rumanisë me 10 për qind duke filluar nga 16 shtatori, dhe e njoftoi këtë pa dhënë ndonjë shpjegim për arsyet, deklaroi ministri rumun i energjisë Razvan Nicolescu të hënën.
Njoftimi i Gazprom erdhi tri ditë pasi Rusia uli me 5 për qind volumin e furnizimit të zakonshëm gjithashtu pa dhënë shpjegime për arsyet.
“Vendimi është suprizues por ne mund ta menaxhojmë situatën. Popullata nuk do të preket edhe në rast se furnizimet me gaz nga Rusia do të ndalojnë totalisht,” tha Nicolesku.
“Rumania nuk është në rrezik për shkak se ne kemi gaz të mjaftueshëm në depozita… edhe prodhimi ynë i gazit është në nivel maksimal,” shtoi ai.
Rumania prodhon rreth 11 miliardë metra kub gaz në vit dhe mbulon 75 për qind të konsumit të vet. Pjesa tjetër importohet tërësisht nga Rusia.
Analistët në Rumani mendojnë se siguria energjetike nuk është një problem madhor dhe se ky vend nuk është aq i shantazhueshëm nga Rusia sa vendet e tjera. “Rumania nuk është vulnerabël si vendet e tjera Europiane,” tha analisti i energjisë Otilia Nutu.
“Gazi nga lindja mbetet i rëndësishëm, por e gjithë mirëqënia jonë nuk varet më tërësisht prej tij. Europa duhet të krijojë një strategji të përbashkët energjetike për të reduktuar varësinë nga Rusia.”
Rumania po shikon sakaq mundësinë e reduktimit të varësisë nga energjia e Rusisë, më së shumti përmes diversifikimit të rrugëve të furnizimit me gaz.
Gjithsesi, ndërsa Rumania mund të kujdeset vetë për furnizimet me gaz në rast se furnizimet nga Rusia ndërpriten, ajo nuk është në gjendje të ndihmojë vende të tjera.
Ajo nuk mund të eksportojë gaz te vendet fqinje si Bullgaria, Serbia dhe Ukraina për arsye teknike. Një gazsjellës u ndërtua së fundmi për t’u lidhur me Moldavinë por për momentin ai mbulon vetëm 3 për qind të nevojave të Moldavisë.
Ndërsa kompania ruse nuk e ka shpjeguar se për çfarë arsyeje ka pakësuar furnizimin, ka gjasa që vendimi lidhet me mbështetjen e fortë që Rumania i ka dhënë sanksioneve perëndimore të imponuara ndaj Rusisë për rolin e Moskës në krizën e Ukrainës lindore.
