Policia thotë se ka zbuluar 500 emigrantë ilegalë vetëm përgjatë dy javëve të fundit, në përpjekje për të kaluar Maqedoninë në rrugën e tyre drejt Europës Perëndimore.
Policia e Maqedonisë ka zbuluar një numër rekord refugjatësh nga Siria ndërsa këta të fundit po përpiqeshin të kalonin ilegalisht këtë vend me shpresë për të arritur në Europën Perëndimore. Vetëm përgjatë dy javëve të fundit policia kapi 500 refugjatë, që të gjithë njerëz të dëshpëruar që po i largoheshin luftës civile në Siri. Kjo është dallga më e madhe në shumë vite.
Autoritetet thonë se shumica e tyre nuk kishin dokumente identifikuese dhe nuk kanë kërkuar azil në Maqedoni. Ata janë kthyer sërish në Greqi.
Vetëm disa prej tyre, më së shumti gra dhe fëmijë, të cilët qenë të rraskapitur nga udhëtimi, janë marrë në qendrat e strehimit në vend.
“Sirianët po hyjnë më së shumti nga Greqia dhe sipas protokolleve të ripranimit, shumica dërgohen sërish në Greqi,” tha zëdhënësi i policisë Ivo Kotevski.
“Për pjesën tjetër ne po punojmë për të identifikuar vendin nga ku hynë ilegalisht në Maqedoni,” shtoi ai.
Sipas protokolleve të kthimit, policia i kthen emigrantët ilegalë në vendin nga ku kanë hyrë në Maqedoni.
Ndryshe nga më herët, kur refugjatët më së shumti gjendeshin nëpër makina apo kamionë, policia ka zbuluar së fundmi një numër më të madh emigrantësh që fshiheshin në trena mallrash.
Dy javë më parë, autoritetet zbuluan një grup prej 125 refugjatësh sirianë të fshehur në një tren që transportonte qymyr nga porti i Selanikut në Greqi për në Maqedoni. Refugjatët u zbuluan në qytezën e Velesit në Maqedoninë qendrore.
Maqedonia është një nga shumë vende të Ballkanit që po përballet me rritje të fluksit të refugjatëve nga Siria dhe Iraku.
Rruga e zakonshme kalon nga Turqia për në Bullgari ose Greqi. Ata që mbërrijnë në Greqi zakonisht synojnë Europën Perëndimore duke kaluar në Maqedoni. Ndryshe nga Bullgaria dhe Greqia, të cilat janë vende anëtare të BE-së, Maqedonia nuk ka mundësi të kërkojë fonde të BE-së për të menaxhuar situatën.
Greqia ka marrë sakaq ndihmë financiare nga Frontex, agjencia e Bashkimit Europian përgjegjëse për kufijtë e jashtëm të BE-së.
Bullgaria ndërkohë ka njoftuar se do të shtojë pjesët e kufirit me Turqinë të blinduara me gardh me tela me gjemba në mënyrë që të luftojë ardhjet ilegale të refugjatëve nga Siria dhe Iraku.
“Disa qindra refugjatë nga Siria nuk përbëjnë kërcënim të drejtpërdrejtë për sigurinë e Maqedonisë”, tha profesori i Sigurisë Metodi Hadzi-Janev në Shkup.
“Ata vijnë për arsye ekonomike dhe sociale dhe qëllimi i tyre është që të mbërrijnë në Europën Perëndimore. Ata e përdorin Maqedoninë vetëm për tranzit”, shtoi ai.
Ai thotë se transportimi i refugjatëve që shpresojnë për një jetë më të mirë në Europë është kthyer në një biznes fitimprurës për trafikantët të cilët i marrin mijëra euro për person.
Policia e Maqedonisë thotë se ka ndërmarrë masa shtesë për të ndaluar refugjatët si dhe për të ndëshkuar ata që përpiqen të përfitojnë nga trafiku.
Ata po zhvillojnë takime më të shpeshta me homologët në Bullgari, Serbi dhe Shqipëri dhe kanë krijuar patrulla kufitare të përbashkëta përgjatë kufijve. Bashkëpunimi me Greqinë po rritet gjithashtu, veçanërisht në fushën e ripranimeve.
Sipas Organizatës së Kombeve të Bashkuara, konflikti i Sirisë ka shkaktuar deri tani më shumë se 3 milionë refugjatë.
