Konferenca Ipeshvnore e Shqipërisë publikoi sot axhendën e vizitës së Papës Françesk në Shqipëri si dhe dha disa informacione të vlefshme për shqiptarët që pëlqejnë të ndjekin meshën e tij në Sheshin Nënë Tereza.
Sipas njoftimit, besimtarët e Tiranës apo ata që do të vijnë në Tiranë nga qytetet e tjera për të ndjekur meshën e Papës këshillohet që të hyjnë në sheshin Nënë Tereza sa më herët në mënyrë që të shmanget konfuzioni dhe për të respektuar udhëzimet e forcave të sigurisë para mbërritjes së Atit të Shenjtë.
Mesha e Shenjtë do të nisë në orën 11 të paradites së 21 shtatorit.
Për të ardhurit nga jashtë Tiranës është përcaktuar që vendi i parkimit të makinave të jetë pranë Fushës së Aviacionit për besimtarët nga Veriu, në zonën përreth stadiumit Selman Stërmasi për të ardhurit nga jugu dhe në rrugët pranë Saukut në hyrje të Tiranës për të ardhurit nga juglindja.
“Ministria e Shëndetësisë do të vërë në dispozicion disa ambulanca dhe ekipe mjekësore, që do të ndodhen në sheshin pas stadiumit “Qemal Stafa”. Për të asistuar pjesëmarrësit do të jenë në shesh një numër i madh vullnetarësh të Kishës Katolike dhe të Shtetit Shqiptar, si edhe do të vendosen disa tenda për të shpërndarë ujë”, thuhet në njoftim.
Papa Françesk do të vizitojë Tiranën si vendi i parë Europian që vizitohet nga Ati i Shenjtë që kur mori këtë post.
Papa do të takohet me krerët e qeverisë së Shqipërisë, me krerët e besimeve të tjera fetare të vendit si dhe do të bekojë të sëmurët dhe jetimët. Në mbrëmjen e 21 shtatorit ai do të kremtojë lutjen mbrëmësore me Meshtarët, rregulltarët, rregulltaret, seminaristët dhe lëvizjet laikale në Katedralen e Tiranës . Në këtë takim do të marrin pjesë rreth 800 meshtarë, motra, rregulltarë dhe rregulltare si dhe përfaqësues të lëvizjeve laikale në Shqipëri. Përveç lutjes së Mbrëmësores, gjatë këtij takimi do të ketë edhe dy dëshmi nga një meshtar dhe një motër që i kanë mbijetuar periudhës së egër të komunizmit.
