Kryeministri i Serbisë thotë se pensionet dhe pagat në sektorin publik duhet të ulen si pjesë e një pakete të masave të kursimit të qeverisë.
Aleksandar Vucic, kryeministri i Serbisë, të mërkurën, tha se pensionet dhe pagat në sektorin publik mbi 25 mijë dinarë në muaj [€211] do të ulen nga 3 deri në 20 për qind në tetor.
“Pjesa më e madhe e pensionistëve, 60.2 për qind të tyre, nuk do të preken,” i tha Vucic televizionit publik të Serbisë RTS.
Pensionet mes €211 dhe €256 do të ulen me 3.1 për qind dhe ato mes €256 dhe €295 do të ulen me 6.2 për qind ndërsa pensionet mbi €337 do të ulen me 9 për qind. Pensionet më të larta se 844 euro do të ulen me 15-16 për qind.
Pagat e sektorit publik mbi 211 euro do të ulen me 10 për qind ndërsa ato më të larta se 844 euro do të ulen me 20 për qind.
“Pagat në sektorin publik janë rreth 40 për qind më të larta se sa ato në sektorin privat, i cili aktualisht po mbështet sektorin publik,” deklaroi Vucic, duke shpjeguar racionalitetin e shkurtimit të pagave.
Masa të tjera kursimesh që qeveria ka ndër mend të ndërmarrë përfshijnë pakësimin e ekonomisë “gri”, uljen e subvencionimeve shtetërore për kompanitë publike, mbështetjen për sipërmarrjen private, shkurtimin e stafit në administratën publike dhe shkurtimin e shpenzimeve në mallra dhe shërbime.
Serbia shpreson se do të kursejë rreth 700 milionë euro në vit nga kjo paketë kursimesh.
“Sa i përket të ardhurave – ne presim më shumë investime,” tha Vucic, duke shtuar se rritja mund të jetë e përmbajtur në vitin 2015 ndërsa Serbia shpreson se do të dalë nga kriza në vitin 2016.
Sipas kryeministrit, vendi është “kilometra larg” nga falimenti.
“Serbia është likuide dhe ne kemi para për të mbajtur sistemin deri në prill pa kredi të reja,” deklaroi ai.
Burimi: Balkaninsight