Vizita e Papës Françesk të dielën në Tiranë, ku ai deklaroi që bashkëjetesës fetare në Shqipëri ishte një model që bota mbarë duhet ta ndjek, ka mbrujtur qytetarët Shqiptarë me një ndjenjë të re krenaria për vendin.
“Papa e bëri mirë që erdhi,” thotë Enkelejda Caslli, infermiere në qendrën spitalore universitare “Nënë Tereza,” në Tiranë. “Tani të paktën do flasë bota diçka të mirë për ne,” shtoi ajo.
Ndërkohë Fariu, një tregtar në rrugën Myslym Shyri në Tiranë, ishte i impresionuar nga mënyra e rregullt dhe e organizuar mirë e ceremonialit të vizitës së Papës Françesk.
“Ajo që më pëlqeu mua ishte që shteti tregoi se po të dojë e bën zap vendin,” tha ai.
“Edhe Europa këtë vlerëson më shumë, sepse vendit nuk i nevojitet asgjë tjetër veçse një rregull dhe disiplinë e atillë,” shtoi Fariu.
Papa Françesku arriti të dielën në mëngjes në Shqipëri, për një vizitë njëditore dhe pas takimit me Presidentin Bujar Nishani, mbajti një meshë përpara mijëra pelegrinëve, myslimanë dhe të krishterë, në sheshin Nënë Tereza në Tiranë.
“Toleranca fetare është një pasuri që duhet ta ruani mirë, një e mirë e çmuar dhe meriton një vëmendje të veçantë në këto kohë kur ekstremizmi po minon bashkëjetesën fetare, duke u kthyer në rrezik për dhunë,” tha Papa Françesk gjatë fjalimit të tij në Presidencë.
“Askush nuk duhet të mendojë se mund ta përdorë forcën e Zotit për akte të dhunshme,” shtoi ai.
Sipas zëdhënësit të Vatikanit Federico Lombardi gati 300 mijë pelegrinë kishin zbritur në rrugët e Tiranës për të mirëpritur Papën Françesk.
Renato, një student i medresesë së Tiranës, u shpreh që vizita e Papës Françesk kishte ngazëlluar të gjithë shqiptarët, qofshin të krishterë apo myslimanë.
“Papa erdhi këtu sepse vlerëson bashkëjetesën harmonike që kemi ne mes feve tona,” tha ai.
“Ai nuk tha se Krishti është më i mirë se Muhamedi, kështu që edhe ne që i përkasim një besimi tjetër ndihemi të privilegjuar,” Renato shtoi.