Lavdrim Muhaxheri nga Kosova dhe Nusret Imamovic nga Bosnja vendosen nën sanksionet amerikane kundër terrorizmit.
Dy ekstremistë islamikë nga Ballkani hynë në listën e Shteteve të Bashkuara të Amerikës të Organizatave Globale Terroriste duke u vendosur nën sanksione dhe penalitete, bëri të ditur Departamenti i Shtetit i SHBA-ve sot.
“Lavdrim Muhaxheri është një shqiptar i Kosovës që lufton për ISIL (Shteti Islamik i Sirisë dhe Irakut) dhe vepron si në Siri ashtu edhe në Irak. Muhaxheri doli në lajmet ndërkombëtare në korrik 2014 pasi publikoi foto në Facebook ku shfaqej duke i prerë kokën një të riu,” thuhet në deklaratën e Departamentit të Shtetit.
“Nusret Imamovic është një udhëheqës terrorist nga Bosnja që vepron në Siri. Pas mbërritjes së tij atje, Imamovic mbështeti në mënyrë aktive ekstremizmin e dhunshëm dhe tashmë besohet se po lufton me Frontin Al-Nusra,” vijon më tej deklarata.
Departamenti i Shtetit shtoi në listën e vet të terroristëve nën sanksione dhjetë individë dhe tri organizata të tjera, pothuajse që të gjitha të lidhura me konfliktin në Siri.
