Gjeneral Rahim Ademi, i cili u shpall i pafajshëm për krime kundër njerëzimit, ka nisur një padi kundër Kroacisë ku kërkon dëmshpërblim për shtatë muajt që kaloi në burgim në Gjykatën e Hagës.
Ademi, i cili është në gjyq në gjykatën e mbështetur nga OKB-ja, i akuzuar për krime kundër njerëzimit të kryera gjatë operacionit kontradiktor Medak Poket të Ushtrisë Kroate kundër forcave serbe në 1993, po kërkon një milion kunas (rreth 130 mijë euro) si kompensim, raportoi media lokale të martën.
Avokatja e tij e akuzoi Kroacinë se e ka çuar gjyqin në Gjykatën e Hagës duke pasur dijeni për keqkuptimin, duke shkaktuar që gjenerali të kalojë më shumë kohë seç duhej në paraburgim.
“Gjeneral Ademi ishte në paraburgim për faktin se shteti çonte dokumente të përzgjedhura që tregonin se ai kishte dhënë urdhra me vetëdije për aksionin ushtarak në Medak Poket,” tha avokatja Jadranka Slokovic.
“Është e qartë nga dokumentet dhe mënyra sesi ato u zgjodhën se shteti po fshihte dokumente që të mund të ndihmonte komandantin e vet ushtarak t’i shmangej burgut dhe aktakuzës,” shtoi Slokovic.
I lindur në Kosovë, Ademi, që la Ushtrinë Popullore Jugosllave për t’iu bashkuar forcave kroate përpara se të fillonte lufta në vend, u dorëzua vullnetarisht në Gjykatën Ndërkombëtare të Krimeve për ish-Jugosllavinë në korrik 2001.
Ai u lirua nga gjykata e Hagës në shkurt 2002 dhe çështja u transferua në Zagreb, ku ai u lirua në maj 2008.
“Ai nuk do t’i kalonte ato muaj në burg në Gjykatën e Hagës nëse shteti kroat nuk do të çonte me qëllim dokumente që tregonin se roli i Ademit si komandant ishte më i rëndësishëm se në të vërtetë,” Argumentoi Slokovic.
I pandehuri tjetër në të njëjtën çështje në gjyqin në Kroaci, Gjeneral Mirko Norac, u dënua për mbështetje të krimeve kundër njerëzimit, krime lufte kundër serbëve dhe të burgosurve të luftës në zonën Medak Poket në shtator 1993.
Slokovic tha për median se çështja e Ademit kundër Kroacisë ka nisur dy vite më parë, por ai vendosi ta bëjë publike tani.