Në shkrimin e gazetës angleze ‘Guardian’, lideri kosovar ka hedhur poshtë akuzat se vendi i tij po kthehet në një bazë për islamistët.
Kryeministri kosovar Hashim Thaçi ka përdorur gazetën britanike të qendrës së majtë ‘Guardian’ për të hedhur poshtë akuzat se Kosova po kthehet në strehë të Islamistëve radikalë.
Në një artikull në kolonën e Komenteve, lideri kosovar thotë se ka vënë re një numër komentatorësh të ekstremit të majtë dhe të djathtë që vazhdojnë të kërkojnë prova në mbrojtje të tezës se ndërhyrja e ushtrisë amerikane në Kosovë kundër regjimit serb në vitin 1999 ka qenë një gabim.
“Disa nga këta zëra e portretizojnë Kosovën si një projekt të dështuar të ‘ndërhyrjeve neoliberale’ dhe… përpiqen të përdorin grimca të lajmeve nga Kosova si dëshmi të këndvështrimit të tyre politik,” thotë ai.
“Sulmet më të fundit kundër vendit tim po vijnë nga ata që pretendojnë se Kosova po kthehet në një parajsë të sigurtë për radikalizmin islamist dhe një eksportuese e luftëtarëve të huaj në Irak dhe Siri,” shton ai.
Thaçi thotë se kjo akuzë është e gabuar. Qeveria e Prishtinës, shton ai, po ndërmerr “veprime konkrete për të ndaluar largimin e të rinjve, që shpesh vijnë nga komunitete të margjinalizuara, drejt zonave të luftës në Irak dhe Siri.
“Ne kemi miratuar një ligj që ndalon luftimin në luftra jashtë vendit. Në dy aksione të ndryshme të policisë, ne kemi arrestuar 45 militantë të dyshuar si dhe imamë të caktuar që sponsorizojnë, lobojnë dhe mbështesin ekstremistët.”
Shumica e kosovarëve janë myslimanë, shtoi kryeministri, por njëkohësisht, ata “refuzojnë tërësisht dogmën fetare të propozuar nga rrymat radikale të islamit politik, dhe ne nuk mund të lejojmë që kjo të rrezikojë rrugëtimin tonë drejt një anëtarësimi të mundshëm në Nato dhe BE.”
“Ne do të shkatërrojmë çdo celulë që beson, në mënyrë të gabuar, se mund të gjejë strehë në Kosovë. Ashtu si edhe Ushtria Çlirimtare e Kosovës refuzoi ofertat nga xhihadistët që donin të merrnin pjesë si vullnetarë në luftën e vitit 1999, ne tani po refuzojmë djallin e ri që po lind nga Shteti Islamik (Isis) dhe grupe të ngjashme në Lindjen e Mesme.”
Artikulli i kryeministrit kosovar vjen në një situatë të mbingarkuar nga raportimet se disa qindra shqiptarë, kryesisht nga Kosova dhe Shqipëria, i janë bashkuar Shtetit Islamik, militantëve në Siri dhe Irak.
Kosova nuk është e vetme në shqetësimet lidhur me radikalizmin islamik.
Disa mijëra të rinj besohet se janë larguar nga Europa drejt zonave të nxehta të Lindjes së Mesme, si nga Britania e Madhe, Franca, Belgjika dhe vende të tjera.
