Komiteti Shqiptar i Helsinkit, një organizatë që punon për të drejtat e njeriut, njoftoi se ka verifikuar në terren pretendimet e banorëve të zonës naftëmbajtëse të Patos-Marinzës dhe ka konstatuar ndotje në nivele alarmante.
“Përfaqësuesit e KShH-së shkuan në zonë, ku konstatuan se shumë pretendime të banorëve të zonës ishin të drejta. Ajri në këtë zonë rezulton i ndotur me gazra që çlirohen nga proces i nxjerrjes së naftës. Kjo situate, ndër të tjera, ka shkaktuar edhe shtimin e sëmundjeve të ndryshme ndër banorë të zonës. Në Raportin për monitorimin e ajrit në qytetin e Fierit, për vitin 2014, të kryer nga Drejtorinë Rajonale Shëndetësore e Qarkut Fier rezultonte se, ndotja e ajrit gjatë këtij viti ka qenë më e lartë se vitet e mëparshme, duke mos respektuar jo vetëm normën e cilësisë së ajrit, të miratuar nga Organizata Botërore e Shëndetësisë, por as parametrat vendase,” njoftoi KShH në një deklaratë për shtyp.
Zona naftëmbajtëse e Patos-Marinzës menaxhohet nga kompania Bankers Petroleum dhe realizon shumicën dërrmuese të prodhimit të naftës bruto në Shqipëri.
Kontaktuar nga BIRN për deklaratën e KShH, një zëdhënës i Bankers Petroleum nuk pati komente për momentin por theksoi se kjo kompani ka një program për rikuperimin mjedisor për të cilin ka investuar shuma të konsiderueshme.
Por Komiteti Shqiptar i Helsinkit thotë se niveli i ndotjes vërehet i lartë dhe ekipet mjekësore të zonës shprehin shqetësim për shëndetin e banorëve.
