Banka për Zhvillim e Këshillit të Europës do të japë fonde për të ndihmuar Malin e Zi të ndërtojë shtëpi për refugjatët e kohës së luftës, të cilët kanë 15 vite që enden në banesa të përkohshme.
Ministri i Punës i Malit të Zi, Predrag Boskovic dhe zyrtari Stephen Sellen nga Banka për Zhvillim e Këshillit të Europës nënshkruan të martën marrëveshjen për dy projekte që vlejnë 9.9 milion euro teksa vendi kërkon të gjejë zgjidhjen e problemit të strehimit të mijërave refugjatëve afatgjatë nga luftërat e Jugosllavisë.
Dy projektet e reja do të ofrojnë akomodim të përhershëm për më shumë se 120 familje refugjatësh në kryeqytetin e Podgoricës dhe për 68 të moshuar në komunën e Pljevljas.
Boskovic tha se qeveria kishte bërë përpjekje të mëdha për të zgjidhur një herë e mirë çështjen e njerëzve të zhvendosur “që të gjithë të gëzonin të drejtat si çdo qytetar tjetër i Malit të Zi,” përveç të drejtës për të votuar.
“Qeveria po përballet me problemin e strehimit të 6,063 njerëzve, rreth 1,177 familjeve, të cilët janë refugjatët më të vlefshëm,” tha ai.
Boskovic shtoi se autoritetet kishin si qëllim të zgjidhnin përfundimisht problemin e banesave të akomodimit të përkohshëm të refugjatëve, të njohura si “qendra grumbullimi”.
“Ne duam t’i japim fund një herë e mirë ekzistencës së qendrave të grumbullimit,” tha ai.
Përmirësimi i statusit të refugjatëve në vend është një nga kriteret për pranimin e Malit të Zi në BE.
Sipas të dhënave të qeverisë nga dhjetori 2012, rreth 16.000 refugjatë lufte nga Kroacia, Bosnja dhe Kosova jetojnë në Malin e Zi. Rreth 11000 prej tyre janë nga Kosova. Mbi 3000 janë rom që jetojnë në kampin Konik të refugjatëve në periferi të Podgoricës.
Vitin e shkuar, Komisioni Europian kundër Racizmit dhe Intolerancës, një organ këshillues i të drejtave të njeriut në Këshillin e Europës, e përshkroi gjendjen e kampit në Konik si “çnjerëzore dhe të rrezikshme”.
Qeveria ka aplikuar për fonde për dy projekte të tjera të strehimit të refugjatëve – ndërtimin e 94 apartamenteve në komunën Berane dhe 32 apartamente në Herceg Novi.
Në qershor, u startua programi i ristrehimit të njerëzve të zhvendosur, që parashikon ndërtimin e të paktën 900 njësive strehuese gjatë tri viteve të ardhshme, me ndihmën e donatorëve të huaj.
Vlerësohet se programi do të kushtojë rreth 27 milion euro. Qeveria do të mbulojë 15 për qind të fondeve.
