Shkrimtari shqiptar Fatos Lubonja do të shfaqet në disa ceremoni në disa vende të Britanisë së Madhe në tetor për të promovuar librin e tij “Apokalipsi Falso, nga Stalinizmi te Kapitalizmi”, (False Apocalypse, from Stalinism to Capitalism), i cili është përkthyer në anglisht nga John Hodgson.
Turneu do të fillojë më 15 tetor në Shkollën Ekonomike të Londrës me një bisedë mes Lubonjës dhe përkthyesit të tij dhe do të vijojë në qytete të tjera si Kardifi. Ceremonia e fundit promocionale do të zhvillohet në Festivalin e Letërsisë Ilkey.
“Lubonja ka zgjedhur të tregojë këtë histori të pabesueshme përmes nnjë teknike narrative që operon në dy nivele: një narrator i tretë, i cili përshkruan ngjarjet e shkallës së gjerë që u bënë lajme ndërkombëtare dhe një rrëfimtar personal, Fatos Qorri, alteregoja e shkrimtarit, i cili përshkruan eksperiencën e vet dramatike në një ditar personal,” shkruan publikuesi i librit në Britaninë e Madhe Istros Books.
Libri rrëfen ngjarjet e vitit 1997 në Shqipëri, ku vendi përjetoi një periudhë anarkie pas rrëzimit të një serie skemash piramidale ku shumica e shqiptarëve pati investuar paratë e veta.
Një shkrimtar dhe komentator politik i mirënjohur, Lubonja qe burgosur për 17 vjet në një kamp pune gjatë regjimit komunist të Shqipërisë pasi qe arrestuar në moshën 23 vjeçare.
Pas lirimit të tij nga burgu në vitin 1991, ai ka publikuar disa libra përfshirë edhe kujtimet e kohës së burgut.
