Pasi një investigim nga BIRN solli fakte të reja mbi gjuetinë e paligjshme më gjeneratorë në liqenin e Shkodrës, Ministria e Bujqësisë ka ngritur një task-forcë për të verifikuar gjendjen në terren.
“Ministria e Bujqësisë, Zhvillimit Rural dhe Administrimit të Ujërave ka ngritur një grup Task-Force, e cila do të verifikojë dhe do të inspektojë situatën në terren në lidhje me këtë çështje,” tha në një prononcim për BIRN zëdhënësi i këtij institucioni Shaban Sulçe.
Intervista të bërë nga BIRN me peshkatarë që peshkojnë në mënyrë të paligjshme me gjeneratorë në liqen sugjerojnë që ky fenomen vazhdon të jetë i përhapur.
Peshkatarët e paligjshëm pretendojnë se në liqenin e Shkodrës mund të gjuhet pa u shqetësuar me gjenerator në qoftë se i paguan rryshfet Organizatës për Menaxhimin e Peshkimi, OMP, e cila është mandatur për ruajtjen e liqenit nga Ministria e Bujqësisë.
“OMP-ja e ka kthyer liqenin në pellgun e saj privat,” i tha BIRN-it një ndër peshkatarët që përdorin gjeneratorin për të kapur peshq. “Ata bajnë si të dojnë vetë, lozin si të dojnë vetë,” shtoi ai.
OMP nga ana e saj i hedh poshtë me forcë akuzat dhe thotë që ato vijnë si rrjedhojë e luftës pa kompromis që ajo i ka shpallur gjuetisë së paligjshme në liqenin e Shkodrës.
Në një prononcim për shtyp, OMP thotë se peshkatarët që e akuzojnë organizatën se merr pjesë në aktivitetin e tyre të paligjshëm, gënjejnë dhe kërkojnë të bëjnë ‘pis’ atë.
Sipas OMP-së, peshkimi i paligjshëm me gjenerator në liqenin e Shkodrës ‘mbahej gjallë nga korrupsioni i strukturave lokale shtetërore: inspektorë peshkimi, trupat Ranger dhe elementë të policisë kufitare,’ dhe mbas marrjes në administrim të liqenit nga OMP ky fenomen është reduktuar ndjeshëm.
“Zhdukja e gjeneratorëve, natyrisht nuk është një punë e lehtë dhe që do të kalonte pa reaksion nga ata persona keqbërës që për vite kanë kryer këtë aktivitet,” thotë OMP.
“Ne ju deklarojmë se gjeneratorët në liqenin e Shkodrës ishin dhe do të mbeten një histori e keqe dhe e mbyllur përfundimisht,” thuhet në deklaratë.
