Familja e tri viktimave të vrasjeve bën thirrje për rigjykim pas akuzave se një gjykatës i Misionit të BE-së për sundimin e ligjit mori ryshfet për të shpallur të pafajshëm një nga të dyshuarit.
Skandali që goditi misionin e Bashkimit Europian për sundimin e ligjit në Kosovë (EULEX) këtë javë kur njëra nga prokuroret akuzoi një gjykatës për korrupsion ka marrë një kthesë të re pasi familja Baftiu bëri thirrje për rihapjen e hetimeve të rastit të vrasjeve në dritën e aludimeve se një nga të dyshuarit pagoi një ryshfet për t’i shpëtuar dënimit.
“Pas dëshmive të reja që u shfaqën në media, ne besojmë ka prova të mjaftueshme për të patur rigjykim në këtë rast dhe kjo është arsyeja se pse ne u takuam me Jonathan Ratel, kreun e prokurorisë speciale të EULEX dhe i kërkuam atij të marrë parasysh provat për rigjykim,” tha Arben Baftiu.
Urim Baftiu (16 vjeç), Sylejman Baftiu (17) dhe Neshat Baftiu (28) u vranë në vitin 2007 pranë Kaçanikut, një qytezë e vogël në lindje të Kosovës.
Dy burra, Besnik Hasani dhe Shpend Qerimi, që të dy ish oficerë të forcave speciale policore të Kosovës, u dënuan për vrasjet. Në atë kohë ata sakaq po vuanin dënimin për një shpërthim bombe në Bulevardin Bill Clinton në Prishtinë në 2007, shpërthim që vrau dy njerëz.
Gjithsesi i dyshuari i tretë në vrasjen e trefishtë të familjes Baftiu, Nusret Cena, doli i pafajshëm.
Prokurorja e pezulluar e EULEX Maria Bamiah pretendoi këtë javë se gjykatësi italian Francesco Florit ka marrë 300 mijë euro ryshfet për të nxjerrë të pafajshëm të gjithë të akuzuarit, por liroi vetëm Cenën.
“Siç e kuptoj unë nga këto pretendime, kur këto para po bëheshin gati të jepeshin, Francesco Flori tha jo, me 300 mijë unë mund të liroj vetëm një person, kështu që Nusret Cena u lirua,” tregoi Bamieh për emisionin televiziv Jeta në Kosovë të BIRN.
Gjykatësi mohoi prerazi këto akuza. “Unë nuk kam marrë kurrë dhe nuk më është ofruar kurrë asnjë ryshfet nga askush,” tha Florit për BIRN.
Por akuzat e Bamiah u mbështetën nga Flurim Asani, vëllai i të burgosurit Besnik Hasani.
“Unë shkova në Shqipëri me avokatin tim Mahmut Halimi i cili takoi Francesco Florit në portin e Durrëst dhe ata shkuan në një varkë dhe patën një takim për katër orë. Takimi qe për të negociuar se sa shumë para duhej të paguheshin për lirimin e tre të dyshuarve, përfshirë vëllanë tim,” tha Asani për BIRN.
“Pastaj unë kontribuova 50 mijë euro për 270 mijë euro në total për t’ia dhënë Francesco Florit përmes Nusret Cenës dhe avokatit të tij Azem Vllasi,” shtoi ai.
BIRN ka siguruar një dokument që tregon se Asani dha të njëjtën deklaratë duke inkriminuar Florit te Departamenti Ekzekutiv i Hetimeve Penale të EULEX më 25 qershor 2013. Kjo sugjeron se misioni i BE-së ka qenë i informuar për akuzat për korrupsion prej disa kohës, siç pretendon edhe Bamiah.
Kur BIRN kontaktoi ish të dyshuarin Nusret Cena dhe avokatët Mahmut Halimi dhe Azem Vllasi, që të tre mohuan akuzat se qenë të përzjerë në ryshfet.
“Nuk kam shkuar kurrë në Shqipëri me Asanin dhe nuk e kam takuar kurrë Florit jashtë sallës së gjyqit,” tha Halimi.
Nuk është e qartë se çfarë veprimi do të marrë EULEX në lidhje me kërkesën e familjes Baftiu për rigjykim.
“[Shefi i Prokurorisë Speciale të EULEX Jonathan] Ratel na tha se nuk duhet t’i besojmë lajmeve të publikuara në media,” tha Arben Baftiu.
Kur u kontaktua nga BIRN, Ratel tha: “Nuk vlerësoj se ka nevojë t’i përgjigjem këtyre akuzave.”