Pas lajmeve se Rusia po redukton furnizimin me gaz të Serbisë për shkak të një mosmarrëveshjeje për borxhet, kryeministri i Serbisë deklaroi se çështja me Moskën do të zgjidhet shpejt.
Udhëheqësit e serbisë konfirmuan të premten raportimet se Rusia po bëhej gati të reduktonte sasinë e gazit që i jep Serbisë – por thanë se furnizimet me gaz në përgjithësi të popullsisë nuk do të preken.
Gazeta e përditshme Danas raportoi të premten se Rusia po ul furnizimin me gaz me 28 për qind si pasojë e një borxhi të pashlyer prej 200 milionë dollarësh.
Kryeministri Aleksandar Vucic i tha gazetarëve të premten se Serbia do të zgjidhë të gjitha problemet në lidhje me borxhin për gazin me Moskën.
“Nuk do të ketë probleme. Qytetarët e Serbisë nuk kanë pse të shqetësohen. Ne do të jemi në gjendje të kapërcejmë problemet potenciale mbi formën e ripagesave dhe afateve kohore me partnerët tanë rusë,” tha Vucic të premten.
Danas tha se presidenti Vladimir Putin i Rusisë dhe kryeministri i Serbisë Vucic nuk kishin arritur marrëveshje mbi ripagesat gjatë vizitës së profilit të lartë të Putinit në Beograd në mes të tetorit.
Zorana Mihajlovic, zëvendëskryeministre dhe ministre e Ndërtimit tha se Banatski Dvor – rezervuari kryesor i gazit në vend qe “tërësisht plot dhe Serbia mund ta përdori këtë gaz. Siguria energjetike është në një nivel aktualisht sa plotëson nevojat e Serbisë,” tha Mihahlovic për një televizion.
Ajo shtoi se ndërsa Serbia i detyrohej Rusisë rreth 200 milionë dollarë për gazin, Beogradi qe gati të paguante 100 milionët e para sëshpejti.
Ministrja tha se çështjet mund të zgjidhen deri javën tjetër, kur një delegacion i Serbisë do të vizitojë Moskën.
