Projektligji për buxhetin e vitit 2015 parashikon rritjen e numrit të policëve dhe shtimin e 1,300 punonjësve te Ministria e Mirëqënies Sociale dhe Rinisë.
Qeveria shqiptare ka vendosur të rrisë numrin e të punësuarve në administratën publike qendrore për herë të parë pas shumë vitesh tkurrjeje të vazhdueshme, duke shtuar 1,200 vende të reja pune neto.
Sipas projektligjit për buxhetin e shtetit 2015, numri i të punësuarve në administratën publike të institucioneve qendrore do të rritet në 87,700 vetë nga 86,500 që ka qenë në vitin 2014. Por kjo rritje do të jetë e pabarabartë mes institucioneve të ndryshme. Ministria e Arsimit dhe e Sportit do të përjetojë shkurtimet më të mëdha në stafin e vet ndërsa Ministria e Mirëqënies Sociale dhe Rinisë do të përjetojë rritjen më të madhe. Ndryshimet në numrin e të punësuarve në këto ministri duket se lidhen me transferimin e segmentit të arsimit profesional nga Ministria e Arsimit te ajo e Mirëqënies.
Numri i të punësuarve në Ministrinë e Arsimit do të bjerë me 1,400 vetë duke u reduktuar në 37,500. Reduktime do të pësojë edhe numri i të punësuarve në Ministrinë e Mbrojtjes, stafi i të cilës do të pakësohet nga 9,500 në 9 mijë vetë.
Nga ana tjetër, numri i të punësuarve në ministrinë e Brendshme do të rritet nga 13,600 që qe këtë vit në gati 14,700 vetë.
Te institucionet e tjera, Ministrisë së Mjedisit do t’i pakësohen të punësuarit me 100 vetë. Ministrisë së Shëndetësisë do t’i shtohen 58 vetë ndërsa Ministrisë së Drejtësisë do t’i shtohen 428 vetë.
Tendenca e përgjithshme e dekadës së fundit në Shqipëri ka qenë reduktimi gradual i të punësuarve në sektorin publik dhe veçanërisht në administratën publike, pas shfryrjes së imponuar në këtë administratë që nga koha e rënies së regjimit komunist. Në vitin 2003 psh, administrata qendrore dhe institucionet qendrore të pavarura kishin sëbashku 110 mijë punonjës.
Përveç administratës qendrore, në Shqipëri ka edhe rreth 70 mijë të punësuar të tjerë në administratën e pushtetit vendor apo në ndërmarrjet ekonomike nën pronësi publike.
Që nga ndryshimi i qeverisë në vitin 2013, punësimet dhe pushimet nga puna në administratën publike kanë qenë tema kryesore e debatit politik në vend. Opozita akuzon qeverinë se nuk po respekton një ligj për administratën publike që u miratua me konsensus në vitin 2013 dhe që vështirësonte procedurat e pushimeve nga puna për qëllime politike. Qeveria nga ana e saj ka ndërmarrë një seri ndryshimesh ligjore që t’i krijojë vetes mundësinë e pushimeve nga puna dhe punësimeve të reja. Linku me dokumentin e buxhetit ku paraqitet numri i të punësuarve në administratë.
