Vajza e ish udhëheqësit të serbëve të Bosnjës, i cili është aktualisht në gjyq për krime lufte, u zgjodh si anëtar i parlamentit të Republikës Srpska të dominuar nga serbët.
Komisioni qendror i zgjedhjeve i Bosnjës njoftoi rezultatet finale të zgjedhjeve të përgjithshme të tetorit të hënën dhe konfirmoi se Sonja Karaxhixx-Jovicevic do të jetë anëtare e parlamentit të entitetit të Republika Srpska për katër vitet e ardhshme si përfaqësuese e Partisë Serb Demokratike (SDS), e cila është themeluar nga i ati.
Radovan Karaxhiç, i cili aktualisht po pret vendimin në gjyqin për krime lufte kundër tij në Gjykatën Ndërkombëtare Penale për Ish-Jugosllavinë në Hagë, tha se qe “jashtëzakonisht krenar” që vajza e tij u zgjodh, tha këshilltari i tij ligjor Peter Robinson për BIRN.
Por ish udhëheqësi politik i serbëve të Bosnjës ka “ndjesi të përzjera mbi angazhimin e saj në politikë,” shtoi Robinson.
“Dr. Karaxhiç vetë qe ngurrues që ajo të përzjehej në jetën politike sepse kjo përfshin një sakrificë të madhe për jetën familjare. Ndërsa ai mendon se vajza e tij ka shumë për të kontribuar për të mirën publike, si prind, ai shpreson se paqja do të triumfojë në Bosnjë dhe Hercegovinë në mënyrë që ajo të mos ketë nevojë të bëjë të njëjtat sakrifica si ai,” tha këshilltari.
Sonja Karaxhiç-Jovicevic është mjeke dhe ka shërbyer si delegate në këshillin e komunës në qytezën e familjes së saj në Pale, Republika Srpska përgjatë dy viteve të fundit. Ajo tha para zgjedhjeve të përgjithshme se nëse ajo fitonte një mandat, ajo do të përqendrohej në “çështje të lidhura me familjen, rininë dhe kujdesin shëndetësor”.
Duke folur në median vendëse para zgjedhjeve, Karaxhiç-Jovicevic tha se nëse Gjykata e Hagës është e drejtë, ajo do ta shpallë babain e saj të pafajshëm për akuzat që rëndojnë mbi të: gjenocid, dhunim të ligjeve dhe zakoneve të luftës dhe krime lufte.
“Nëse ne po kërkojmë drejtësi, Karaxhiçi duhet të lirohet menjëherë. Nëse faji i tij është i dukshëm, ai do të qe provuar lehtë. Prokuroria mund të thërrasë disa dëshmitarë dhe t’i japë fund. Por nuk është kështu. Problemi është se ne nuk kemi parë drejtësi nga gjykata,” tha ajo.
Lajmi se Karaxhiç-Jovicevic u zgjodh shkaktoi reagime kritike nga shoqatat e viktimave boshnjake dhe kroate.
Mirsad Duratovic, president i Shoqatës së Ish-të Burgosurve të Kampeve Prijedor ’92, i cili u kthye për të jetuar në Republika Srpska pas luftës, tha se megjithëse ai respekton të drejtën e çdokujt për të garuar për post, zgjedhja e vajzës së Karaxhiçit nuk qe një shenjë e mirë për ripajtimin.
“Nuk është diçka për të cilën të kthyerit janë të lumtur. Është një mesazh i keq, çfarë mund të presim ne nga një Asamble e tillë? Unë i vë fajin kësaj partie politike [SDS]. Kjo tregon se gjërat nuk po ecin përpara, ne kemi zënë në të shkuarën dhe po dëgjojmë të njëjtat mesazhe që prej 20 vjetësh,” i tha Duratovic BIRN.
Duratovic paralajmëroi gjithashtu se njerëzit që janë dënuar për krime lufte dhe që tashmë kanë kryer dënimet e tyre, mund të zgjidhen në parlamentin e entitetit serb të Bosnjës në të ardhmen.
“Ne kemi shumë të dënuar nga Gjykata e Hagës për krime në Prijedor që kanë përfunduar dënimin dhe janë kthyer, Problemi është se ligji i lejon ata të garojnë për post dhe unë besoj se është minimale që këto njerëz të mos lejohet të kthehen në pozicione pushteti,” tha ai.
