Rreth 3 mijë vetë marshuan në qendër të Beogradit në mitingun e parë në 11 vjet të udhëheqësit nacionalist Vojisllav Sheshel, i cili u lirua me kusht nga Gjykata e Hagës ku po gjykohet për kime lufte.
Duke kënduar “Vojo, duka,” “Vojo, Liria”, mbështetësit e udhëheqësit të Partisë Radikale të Serbisë Vojisllav Sheshel i dhanë atij një mikpritje prej heroi kur ai u shfaq në skenë në Shesin Republika të Beogradit në mitingun e tij të parë që kur u lirua me kusht nga Gjykata e Hagës për arsye shëndetësore.
“Siç premtova 12 vjet më parë, unë e mposhta Gjykatën e Hagës. Dhe sot unë vi këtu për të dorëzuar një raport.” Këto qenë fjalët e para të Sheshelit për admiruesit e tij, shumë prej të cilëve kishin simbolet e çetnikëve (nacionalistëve serbë) dhe mbanin flamuj me imazhet e Sheshelit, të presidentit të Rusisë Vladimir Putin dhe të heroit serb të Luftës së Parë Botërore Zivojin Misic.
Shesheli u lejua të rikthehet në Beograd për mjekim të kancerit këtë javë pasi u mbajt i paraburgosur për më shumë se 11 vjet në Gjykatën NDërkombëtare Penale për ish-Jugosllavinë, ku ai po përballet me akuzat për krime lufte të kryera në Bosnjë dhe Hercegovinë, Kroaci dhe Serbi.
“Sheveningeni [qendra e paraburgimit e Gjykatës së Hagës] është një vend vuajtjesh të mëdha. Asnjë nga kroatët [që qenë në gjyq] nuk janë dënuar, shqiptarët u liruan, myslimanët u dënuan me një apo dy vjet dhe vetëm serbët morën dëniime drakoniane,” tha Shesheli.
Udhëheqësi i Partisë Radikale tha se tashmë që ai është kthyer, “është koha për ta rikthyer vendin në themele dhe për t’u integruar më tej me Federatën e Rusisë”.
“Tashmë ne kemi nevojë të rimëbëmbemi, të konsolidohemi të rikthejmë anëtarët tanë dhe të fitojmë anëtarë të rinj. Pesëdhjetë përqind e njerëzve janë kundër Bashkimit Europian dhe ne kemi nevojë ta përdorim këtë fuqi,” tha ai.
Ai tha gjithashtu se misioni i tij në muajt e ardhshëm do të jetë të rrëzojë presidentin e Serbisë Tomislav Nikolic dhe kryeministrin Aleksandar Vucic për shkak se ata kanë “tradhtuar Serbinë”.
Pas fjalimit të tij, Shesheli udhëhoqi turmën në një marsh përmes rrugëve kryesore të Beogradit, duke bllokuar trafikun për një orë.
Ai ka qenë i ndaluar në Hollandë që nga viti 2003, kur ai u dorëzua vullnetarisht. Vendimi në gjyqin e tij për krime lufte pritej të jepej tetorin e vitit të kaluar, por u shty pasi një nga gjykatësit në gjyq u hoq i dyshuar për anësi.
Gjykatësi i ri pritet të studiojë çështjen së paku deri në qershor 2015 për t’u familjarizuar me detajet, duke shkaktuar një vonesë tjetër në gjyqin maratonë.
