Një gjykatës i mbrojtur në gjykatë të hënën deklaroi se Hashim Thaçi personalisht i tha Sylejman Selimit dhe të akuzuarve të tjerë të të ashtuquajturit Grupi i Drenicës të vrasin të dyshuarit për bashkëpunëtorë të autoriteteve serbe.
Një dëshmitar i mbrojtur, me kodin Dëshmitari A, tha në gjykatën e faktit në Mitrovicë të hënën se Hashim Thaçi, aktualisht kryeministër i Kosovës, urdhëroi drejtpërsëdrejti Sylejman Selimin “të vrasë ata njerëz” – duke nënkuptuar të dyshuarit si bashkëpunëtorë të qeverisë së Serbisë.
Dëshmitari tha më tej se Selimi i pati thënë atij se Shtetet e Bashkuara po i paguanin për të vrarë të dyshuarit për bashkëpunëtorë.
“Këtu në gjykatë ju thatë se personat që ju dyshonit se ju rrahën në Likovc ju thanë se ata qenë paguar nga Amerika për të vrarë spiunët. A thatë ju kështu?” pyeti avokati Guy Smith dëshmitarin.
“Po, zotëri,” u përgjigj dëshmitari.
“Kush jua tha ju këtë?”, vijoi avokati.
“Ma tha Sylejman Selimi, Hysni Thaci, Zeqir Demaku dhe Jahir Demaku. Ata më thanë se patën marrë secili 500 marka gjermane në muaj për të vrarë spiunët,” shtoi dëshmitari.
Sylejman Selimi është aktualisht ambasador i Kosovës në Shqipëri dhe ka qenë më herët komandant në Trupat Mbrojtëse të Kosovës.
Gjykatësi i EULEX Darius Sielicki i kërkoi më vonë dëshmitarit të përshkruajë dhomën e paraburgimit në Likovc ku dyshohet se ai qe keqtrajtuar dhe ku pa dhjetë të akuzuarit.
Dëshmitari A tha se ai i njihte këto persona nga më herët dhe se nuk kishte vështirësi në identifikimin e tyre.
Të 15 burrat janë të akuzuar për torturimin dhe keqtrajtimin e të burgosurve në një kamp të UÇK në Likovc/Likovac më 1998. Të akuzuarit hedhin poshtë akuzat.
Të akuzuarit e tjerë janë: Agim Demaj, Bashkim Demaj, Driton Demaj, Selman Demaj, Fadil Demaku, Jahir Demaku, Nexhat Demaku, Zeqir Demaku, Sabit Geci, Ismet Haxha, Sahit Jashari, Isni Thaci dhe Avni Zabeli.
