Biznesmeni grek Petros Stathis është pronari i ri i gazetës më të vjetër të Malit të Zi, Pobjeda, që ka qenë në borxhe të mëdha dhe është çapitur të mbijetojë prej vitesh.
Kompania e Stathisit, Media Nea, mori të hënën kontrollin e të përditshmes së falimentuar e cila zotërohej nga shteti, pasi ishte investitori i vetëm i interesuar për të bërë blerjen problematike.
Kompania greke, që zotëron edhe një tjetër të përditshme malazeze, Dnevne Novine, ofroi 750,000 euro për gazetën. Sipas një lajmërimi të mëparshëm të kompanisë, ajo do t’i bashkojë dy mediat dhe do të mbajë vetëm gjysmën e 197 punonjësve aktualë në Pobjeda.
Kompania, që është gjithashtu një qiramarrëse e rezortit luksoz malazez, Sveti Stefan, do të krijojë një ekip të ri menaxhues dhe botues deri më 1 dhjetor.
Drejtori i Media Nea, Boris Darmanovic, tha se kompania kishte si synim të rriste profesionalizmin dhe të respektonte etikën e medias.
“Skuadra e re redaksionale e Pobjeda-s, që do të caktohet së shpejti, do ta vendosë veten në përputhje me të gjitha parimet etike dhe politikën e qëndrueshme të biznesit të kompanisë,” tha Darmanovic për median.
Pobjeda u përball me falimentin tri muaj më parë. Gjykata Tregtare në Podgricë vlerësoi në fillim të tetorit se ajo i detyrohej kreditorëve më shumë se 10 milionë euro.
Në vitin 2013, qeveria mori pronën më të vlefshme të gazetën, selitë administrative në Podgoricë, si një kompensim për 5 milionë eurot që i detyrohej si taksa.
E themeluar nga Partizanët Jugosllavë fitimtarë përpara fundit të Luftës së Dytë Botërore – emri do të thotë “Fitore” – gazeta ishte fillimisht një buletin i autoriteteve të reja komuniste në Malin e Zi.
Roli i saj është kritikuar shumë në luftërat ballkanike të viteve ’90 kur u akuzua se bënte ‘propagandë lufte dhe gazetari patriotike’ dhe se shfaqte besnikëri të verbër ndaj lidershipit të atëhershëm malazez.
Së fundmi, botuesit dhe menaxherët janë akuzuar se i shërbejnë interesave të kryeministrit Milo Djukanovic në betejat e tij politike ndaj kundërshtarëve.
