Pasi qeveria refuzoi t’i veçonte mësuesit nga ulja e rrogave të sektorit publik, unionet e arsimit të hënën i pakësuan orët e mësimit nga 45 në 30 minuta në formë proteste.
Katër unionet e mësuesve në Serbi hynë në grevë të hënën, duke i pakësuar orët e mësimit nga 45 në 30 minuta, pasi qeveria refuzoi t’i përjashtonte ata nga ulja me 10 për qind e rrogave të sektorit publik që hyri në fuqi më 1 nëntor.
Unionet thanë se orët që japin në shkolla do të jenë të shkurtuara derisa qeveria të pranojë kërkesat e tyre.
Jasna Janković, zëdhënësja e unioneve, tha se mësuesit ishin në dijeni të situatës së vështirë ekonomike, por donin që barra e krizës të ndahej në mënyrë më të barabartë.
“Ne po ngulim këmbë në ndarjen e barabartë të barrës së masave të ashpra. Kur themi të barabartë presim që qeveria të jetë si Robin Hudi dhe të marri prej atyre që kanë shumë dhe jo prej atyre që nuk kanë asgjë,” tha ajo.
Ajo shpjegoi se ndërkohë që rroga mesatare në sektorin publik është 70,000 dinarë ose 585 euro në muaj, në edukim rroga mesatare është 42,000 dinarë ose 342 euro.
“Kur rrogat e sektorit publik të balancohen, atëherë mund të kërkojmë të bëjmë ulje prej 10, 12 ose 15 për qind, por jo kështu. Dikush që punon në një punë më pak kërkuese, si për shembull në një agjenci qeveritare, ka të njëjtën rrogë si një profesor – dhe më pas të dyve u ulet e njëjta sasi,” tha Jankovic.
Uljet e rrogave nuk janë e vetmja arsye e grevës. Slobodan Brajkovic, një lider unioni, tha se mësuesit duan gjithashtu që ligji aktual i arsimit të mos ndryshojë. Ky i ndalon shkollat që të hapin vende të reja pune nëse kanë bërë shkurtime.
Srdjan Verbic, ministri i arsimit, tha se 63 për qind e shkollave në Serbi funksionuan normalisht të hënën.
Megjithatë, ai pranoi se punonjësit e arsimit ishin në një pozicion të paqëndrueshëm prej kohësh.
“Mësuesit po mbajnë një pjesë të madhe të barrës së reformave sociale dhe ekonomike që qeveria ka ndërmarrë dhe është e nevojshme të ndërtohen sisteme pagash që i korrespondojnë përgjegjësive dhe nivelit të edukimit që mësuesit kanë,” tha ai.
Verbić shtoi se ministria do të formonte një grup pune që do të hartojë një marrëveshje të re kolektive speciale, së bashku me përfaqësuesit e katër unioneve.
Buxheti i ri, i miratuar më 22 tetor, përfshin uljet e pagave me 10 për qind në sektorin publik.
Unionet e arsimtarëve kryen një protestë në sheshin “Nikola Pasic” të Beogradit ditën që buxheti i ri u miratua, të cilën Verbic e quajti në atë kohë si “të pakuptimtë, pasi ulja e rrogave të sektorit të arsimit ishte e pashmangshme”.
