Mes objekteve të trashëgimisë komuniste, qeveria mund të zgjidhte mes bunkerit të shokut Enver dhe vendit të torturave të Sigurimit. Qeveria zgjodhi bunkerin.
Kryeministri Edi Rama dukej se kishte një vendim për të marrë para ca kohësh: duhej të zgjidhte se kë nga objektet e trashëgimisë komuniste duhej të bënte muze. Një vendim i qeverisë i 22 korrikut 2014, parashikonte që një objekt sekret i Sigurimit i njohur si “Gjethi”, të kalonte në varësi të Ministrisë së Kulturës për t’u bërë muze. Që kur u mor ky vendim, nuk ka patur fonde për të dhe muzeu i sigurimit (dmth i vuajtjeve) nuk është bërë.
Pastaj, më 10 shtator 2014, qeveria merr një vendim tjetër për organizimet për 70 vjetorin e çlirimit. Këtu sanksionohet krijimi i ekspozitës në bunkerin e shokut Enver, objekti ushtarak i njohur si Objekti 0774.
Diferenca është e stërmadhe.
Objekti “Gjethi”, një ndërtesë e klasifikuar si “sekret”, gjendet në mes të Tiranës, përballë Katedrales Orthodokse. Ajo ndërtesë është një sekret i njohur nga të gjithë. Banorët e Tiranës i referohen Gjethit si “druni ka kufi”. Ai është vendi ku ka arsye të besohet se janë torturuar një numër i papërcaktuar shqiptarësh të akuzuar për krime nga më të ndryshmet. Nëse do të bëhej një muze, gjë që do të thotë që qeveria do të jepte para për ta bërë muze, do të qe një objekt i komunizmit që mbart një leksion për shoqërinë.
Objekti 0774 është gjithashtu një sekret i njohur nga të gjithë. Një seri tunelesh të nëndheshme nga ato të pafundmet e ndërtuara nga komunizmi me punë skllavi në të gjithë vendin. Ai nuk ndryshon shumë nga mijëra tunele të tilla, me përjashtim të faktit që ai qe vendi ku teorikisht do të strehohej udhëheqja komuniste në kohë lufte. Një tjetër kompleks tunelesh që gjenden në Krrabë qe destinuar gjithashtu si bazë e mundshme në kohë lufte, ku qe magazinuar edhe një pjesë e thesarit të shtetit, ai thesari që u vodh.
Objektet e komunizmit janë të shumta në të gjithë vendin. Varet se çfarë zgjedh për të investuar dhe vënë në vëmendjen e publikut. Qeveria e z. Rama mund të zgjidhte ndërtesën e Sigurimit, por vendosi të zgjedhë bunkerin e udhëheqjes. Me një vendim që supozohet se është në funksion të përkujtimit të 70 vjetorit të çlirimit të vendit, jep 7 milionë lekë për pastrimin e banjos së shokut Enver në Shishtufinë. Vendimi i qeverisë thotë: “Për kryerjen e punimeve restauruse në objektin 0774, vendkomanda taktike e Shtabit të Përgjithshëm të Forcave të Armatosura, pranë Batalionit të Mbështetjes së Shtabit të Përgjithshëm të Forcave të Armatosura, nr.8010 dhe për mbështetjen e aktiviteteve të shoqatave të veteranëve”. Siç duket, për qeverinë ka një lidhje të drejtpërdrejtë mes Luftës së Dytë Botërore dhe bunkerit të shokut Enver dhe shoqatave të veteranëve të luftës.
Kuptohet që ka edhe një lidhje tjetër mes ngjarjeve të Luftës së Dytë Botërore, komunizmit dhe objektit Gjethi në qendër të Tiranës.