Foto: Petrit Collaku.
Veteranët e luftës së Kosovës mbajtën një protestë ku kërkuan kthimin e privilegjeve që u lejonin fëmijëve të tyre të hynin në Universitetin e Prishtinës pa pasur nevojë të kalojnë teste.
Foto: Petrit Collaku.
Rreth 200 ish-luftëtarë të Ushtrisë Çlirimtare të Kosovës u mblodhën jashtë universitetit të enjten për të kërkuar që 1000 fëmijët e veteranëve dhe invalidëve të luftës të regjistrohen si studentë pasi rektori ia hoqi këtë privilegj së fundmi.
Kreu i lidhjes së veteranëve të UÇK-së, Smajl Elezaj, kritikoi rëndë rektorin Ramadan Zejnullahu që e ndaloi praktikën, e cila vepronte prej 10 vitesh.
“A e di rektori dhe ai që po e këshillon atë që ka pasur një luftë çlirimtare në Kosovë?” i pyeti Elezaj protestuesit që bërtitën “UÇK, UÇK!”
Lidhja e veteranëve fajësoi rektorin që shkeli kushtet e një memorandumi mirëkuptimi të nënshkruar në 2004 mes lidhjes dhe universitetit, që lejon regjistrimin automatik të 1000 fëmijëve të veteranëve të luftës dhe invalidëve dhe personave të vrarë në konflikt.
Ai tha se rektori duhet të respektojë memorandumin ndryshe protestat mund të transformohen në demonstrata më të mëdha.
Por rektor Zejnullahu tha se ai vendosi ta anulojë memorandumin pasi ishte kundër rregullave të universitetit.
“Ne mendojmë se veprimet tona kanë qenë sipas ligjit dhe rregullave akademike dhe ashtu si do të vazhdojnë të jenë,” tha zyra e tij në një deklaratë pas protestës.
Deklarata tha se universiteti po ndihmonte fëmijët e luftëtarëve të vrarë në konfliktin 1998-99 duke i lejuar ata të regjistroheshin pas përmbushjes së minimumit të kritereve akademike të pranimit.
Por një protestues i ri tha se ai duhet të kishte të drejtën të regjistrohej për të hyrë automatikisht në universitet sepse babai i tij luftoi për Kosovën.
“Rektori është anti-UÇK,” tha protestuesi, që kërkoi të mbetej anonim.
