Policia e Austrisë kreu një operacion masiv duke arrestuar disa të dyshuar me origjinë boshnjake dhe serbe të dyshuar për lidhje me organizatën Shteti Islamik.
Të dyshuarit u ndaluan të premten në operacionin policor me emrin në kod Palmira, i cili synoi të ndalojë të dyshuarit se po rekrutonin luftëtarë në konfliktet e Sirisë dhe Irakut.
Rreth 900 policë e zyrtarë të tjerë morën pjesë në operacion i cili u konsiderua nga autoritetet e vendit si më i madhi “në historinë e sigurisë shtetërore të Austrisë”.
E përditshmja austriake Die Presse raportoi se disa shtëpi dhe xhami u kontrolluan në Vienë, Grac dhe Linz.
Media raportoi gjithashtu se mes të arrestuarve qenë edhe dy njerëz nga Bosnja dhe një nga Serbia.
Agjencia Austriake e Lajmeve tha se të dyshuarve u janë sekuestruar materiale propagandistike dhe para.
Ajo tha se prokurori që po udhëheq hetimet shpjegoi se pati dyshime se një grup terrorist qe përfshirë në “rekrutimin e të rinjve për luftën civile të Sirisë”.
Prokuroria e Bosnjës tha se ka ndihmuar autoritetet e Austrisë në këtë operacion.
“Bashkëpunimi është zbatuar me institucionet partnere nga shumë vende, me synimin për të zbuluar, parandaluar dhe ndëshkuar aktet kriminale në lidhje me terrorizmin sepse këto janë akte kriminale që po kryhen në shumë vende,” tha prokuroria e Bosnjës.
Sipas Die Presse, në total, 160 të dyshuar si xhihadistë nga Austria kanë udhëtuar deri tani drejt Sirisë apo Irakut ose janë ndaluar rrugës për atje, më së shumti të rinj me nivel të ulët arsimor, shumë prej të cilëve kanë rrënjë nga ish – Jugosllavia.
