Në çështjen e parë të llojit të vet në Rumani, gjykata më e lartë e vendit vendosi se një mesazh ‘sulmues’ që një burrë shkroi në faqen e tij të Facebook nuk ishte privat.
Gjykata e Lartë e Kastacionit dhe e Drejtësisë vendosi që Mircea Munteanu, një nëpunës në qytetin Tirgu-Mures, që shkroi një mesazh në faqen e tij të Facebook, ku citonte një slogan nazist ‘Arbeit Macht Frei’, duhet të paguajë një gjobë të vënë për publikim të një materiali ‘fyes’.
Munteanu e shkroi shënimin dy vite më parë në një kritikë të protestuesve anti-qeveritar.
Ai u citua nga një gazetë vendase dhe shpejt pas kësaj, këshilli anti-diskriminim i Rumanisë, CNCD, e gjobiti me 1000 lei (rreth 225 euro) për “propagandë nacionaliste që fyen dinjitetin njerëzor dhe është sulmues ndaj një grupi njerëzish”.
Munteanu vendosi ta ankimojë vendimin në gjykatën e lartë duke thënë se mesazhi i tij ishte një shënim personal në faqen e tij të Facebook.
Por Gjykata e Lartë e Kastacionit dhe Drejtësisë, më e larta në vend, vendosi se faqet në Facebook janë hapësirë publike, ndaj Munteanu duhet të paguajë gjobën.
“Rrjeti social Facebook nuk është i barabartë me një kuti poste, në termat e kontrollit të mesazheve të postuara. Profili personal i një njeriu në Facebook, ndonëse është i lejuar vetëm për një numër të vogël personash mbetet ende hapësirë publike, pasi secili nga ‘miqtë’ mund të shpërndajë informacionin e postuar në faqen e zotëruesit,” tha gjykata në vendimin e saj.
Vendimi, i pari i lloji të tij në vend, mund të bëhet precedent për rastet e ardhshme, ndonëse në sistemin ligjor rumun, që bazohet në sistemin francez, secila çështje gjykohet veçmas dhe nuk bazohet në precedent.
Facebook është shumë i përdorur në Rumani, me rreth 7.5 milionë llogari aktive.
