Ish-kryebashkiaku i Prishtinës, Isa Mustafa u bë kryeministri i ri i Kosovës, ndërsa ish-kryeministri Hashim Thaçi mori postin e zëvendës kryeministrit dhe të ministrit të jashtëm.
Në kuadër të marrëveshjes së koalicionit qeverisës së LDK me Partinë Demokratike të Kosovës, PDK, ish-kryeministri dhe lideri i PDK, Hashim Thaçi, u caktua zëvendës kryeministër dhe ministër i jashtëm.
Qeveria e re e Mustafës, që mori 73 vota nga 120 deputetë në parlamentin e Kosovës, do të ketë 21 ministra, dy më shumë se kabineti i mëparshëm.
Ndërsa kabineti i fundit kishte dy zëvendës kryeministra, i riu do të ketë tre – Hashim Thaçin, zëvendës kryeministrin e parë, Kujtim Shalën, nga LDK dhe Branimir Stojanoviçin nga Lista Serbe.
Kabineti i Mustafës do të ketë gjithashtu një ministër më shumë pa detyrë, pasi Edita Tahirit iu caktua një ministri pa detyra specifike dhe drejtimi i dialogut me Serbinë.
Zëvendës kryetari i PDK, Kadri Veseli, u zgjodh kryetar i Asamblesë, me 71 vota pro.
Zgjedhja e Mustafës si kryeministër u bë e mundur pasi partia e tij nënshkroi të hënën një marrëveshje të ndarjes së pushtetit me PDK, që doli e para në zgjedhjet e qershorit.
Në vitin 2016, pasi mandati i presidentes aktuale, Atifete Jahjaga të mbarojë, Thaçi do ta zëvendësojë atë, sipas marrëveshjes. I njëjti burim shprehet se dy partitë do të ndajnë edhe poste të tjera ministrore.
Duke iu drejtuar deputetëve në parlament, Mustafa u zotua se qëllimi i tij kryesor ishte qeverisja efektive, e përgjegjshme dhe kompetente ‘që do të forcojë më tepër besimin e qytetarëve dhe të miqve tanë ndërkombëtarë’ në Kosovë.
“Ne jemi të vendosur të ndërtojmë një shtet që ofron të drejta dhe mundësi të barabarta për të gjithë qytetarët e vet dhe një shtet që lufton krimin e organizuar, korrupsionin dhe çdo formë të ekstremizmit,” tha ai.
“Jemi gjithashtu të vetëdijshëm për punën që duhet bërë për të zhvilluar më shumë ekonominë dhe mirëqenien e qytetarëve,” shtoi ai.
Zgjedhja e qeverisë së re ishte një çështje urgjente pasi Kosova duhet të miratojë buxhetin e vitit 2015.
