Një raport i brendshëm tepër i rëndësishëm nga një prokurore e Bashkimit Europian mbi dyshime për korrupsion brenda misionit për sundim të ligjit të EULEX-it në Kosovë është zhdukur, tha Avokatja Europiane e Popullit.
Avokatja e Popullit e Bashkimit Europian, Emily O’Reilly, e cila bëri edhe një hetim mbi mënyrën si u trajtuan nga EULEX-i akuzat për marrje ryshfeti të cilat shkaktuan një skandal muajin e kaluar, tha se as misioni i sundimit të ligjit në Kosovë dhe as EEAS i Bashkimit Europian nuk kishin kopje të raportit të ish-prokurores Maria Bamieh për dyshimet për marrje ryshfeti që dorëzoi në vitin 2012.
“Nuk është e qartë se çfarë është bërë me të,” tha O’Reilly në raportin e saj, i cili u publikua ditën e enjte.
Bamieh deklaroi se ajo kishte filluar të dyshonte për korrupsion të mundshëm brenda EULEX-it pasi kishte lexuar regjistrimet e telefonatave të përgjuara në çështjet që ajo po hetonte, por tha se Bashkimi Europian nuk i hetoi dyshimet që ajo hidhte në raportin e brendshëm në vitin 2012.
O’Reilly tha se fakti që një dokument kaq i rëndësishëm duket se është zhdukur ishte tepër shqetësues.
“Fakti që raporti i vitit 2012 mbi parregullsi në EULEX nuk mund të gjendet më, është një çështje tepër shqetësuese më vete,” tha O’Reilly.
Megjithatë, ajo tha se nuk mund të thoshte nëse pretendimet e Bamieh ishin apo jo të besueshme.
Në tetor Bamieh akuzoi ish-kolegun e saj në EULEX, gjykatësin italian Francesco Florit, se kishte marrë 300,000 euro ryshfet për të liruar një kosovar të akuzuar për vrasje.
Florit e mohoi fortë akuzat.
Bamieh, e cila është pezulluar nga puna, ka akuzuar gjithashtu EULEX-in se e ka shënjestruar si informatore.
Shefja e politikës së jashtme në Bashkimin Europian, Federica Mogherini, muajin e kaluar caktoi një ekspert të jashtëm ligjor për të hetuar pretendimet.
Jean Paul Jacqué, një profesor francez drejtësie, do t’ia paraqesë gjetjet e hetimit të tij Parlamentit Europian në janar të vitit 2015.
Europarlamentarët e lartë muajin e kaluar paralajmëruan se pretendimet për marrje ryshfeti mund të kërcënojnë reputacionin e Bashkimit Europain në Kosovë.
“Nëse pretendimet konfirmohen, do të ishte një situatë katastrofike. Besueshmëria e misionit të EULEX-it dhe Bashkimit Europian në Kosovë është në rrezik,” thanë europarlamentarët Elmar Brok dhe Ulrike Lunacek në një letër dërguar Mogherinit.
EULEX-i merret me rastet e krimi të organizuar, korrupsioni dhe krime lufte, të cilat konsiderohen tepër të rëndësishme ose të ndjeshme për t’u trajtuar nga sistemi gjyqësor në Kosovë.
