Ngrihet Grupi i Advokimit të personave me aftësi të kufizuar intelektuale. Seancë dëgjimore në Kuvend për ta dhe për organizatat e tjera që mbrojnë të drejtat e fëmijëve me probleme.
Organizatat që mbrojnë të drejtat e personave me probleme fizike apo intelektuale u bashkuan të hënën në kërkesën e tyre drejtuar Kuvendit të Shqipërisë për më shumë vëmendje ndaj kësaj shtrese sociale.
Në një seancë dëgjimore, të organizuar në Komisionin për Punën, Çështjet Sociale dhe Shëndetësinë, organizatat kërkuan zbatimin e legjislacionit ekzistues dhe ofrimin e më shumë shërbimeve shëndetësore për këtë kategori fëmijësh.
Seanca dëgjimore nisi me një akt simbolik; një letër drejtuar deputetëve nga personat me aftësi të kufizuara, ku ata shprehnin nismën e tyre më të re, ngritjen e një grupi advokimi për çështjet që i shqetësojnë.
“Këta fëmijë kanë vështirësi të integrohen dhe të ndryshojnë statusin e tyre social. Ndaj ata kanë të drejtë të krijojnë grupin e tyre të advokimit, në mënyrë që të bëhen pjesë e vendimeve që merren për ta,” tha para Komisionit Afërdita Seitaj, kryetare e shoqatës “Ndihmoni Jetën”.
Grupi i Advokimit të personave me aftësi të kufizuar është një projekt i shoqatave “Ndihmoni Jetën” dhe MEDPAK, mbështetur nga Fondacioni Soros. Në seancën dëgjimore në Kuvend, vetëpërfaqësimi i të rinjve me probleme fizike dhe intelektuale u cilësua një e drejtë që u jep më shumë dinjitet atyre.
Para Komisonit të drejtuar nga nënkryetarja Klodiana Spahiu, organizatat që përfaqësonin fëmijët e sëmurë me HIV/AIDS, diabet apo talasemi kërkuan më shumë akses në shërbimin shëndetësor dhe më shumë kontribut financiar në përballimin e nevojave që ata kanë.
Buxheti i vogël i vendosur në dispozicion të tyre ishte shqetësimi i përbashkët që ata ndanë me deputetët, përfaqësuesit e Ministrisë së Mirëqënies Sociale dhe atë të Shëndetësisë. Ata shprehën gjithashtu pakënaqësi ndaj aksesit në shërbime dhe burokracive që u shtojnë mundimet në jetë.
Drejtoresha e Përgjithshme e Politikave Sociale, Merita Xhafaj u bëri me dije organizatave se Ministria e Mirëqënies Sociale ishte në përfundim të listës së dixhitalizuar të personave me aftësi të kufizuara. “Në bashkëpunim me mjekët, do të identifikohen edhe nevojat shëndetësore të secilit prej tyre,” premtoi ajo.
Shoqata “Ndihmoni Jetën” vepron prej vitit 2005 si një qendër shërbimesh komunitare për personat me aftësi të kufizuar intelektuale. E vlerësuar për punën e saj, kjo shoqatë ka vendosur të hedhë një hap përpara, duke nxitur vetë personat me aftësi të kufizuar në advokimin e çështjeve që i shqetësojnë.
Një mesazh ndërgjegjësues: Unë MUNDEM! Nga dhe për të rinjtë me aftësi te kufizuara intelektuale
