Dy vite e gjysmë pas akuzave për plagjiaturë në doktoraturën e tij, kryeministri Viktor Ponta tha se po hiqte dorë nga doktoratura në drejtësi.
“Ky është një gjest që duhet ta kisha bërë më parë, që nga momenti kur dolën akuzat e para për tezën time të doktoraturës. Nuk e bëra sepse mendoja se argumentet e mia ishin në mirëbesim dhe sepse nuk doja të ngatërroja veprimet profesionale me ato politike,” lajmëroi kryeministri rumun Viktor Ponta në Facebook të martën.
Ponta shtoi se ai planifikonte të mbaronte një doktoraturë të re një ditë, por vetëm pasi të largohej nga politika.
Universiteti i Bukureshtit, nga ku mori doktoraturën në 2003, tha se e pranonte vendimin.
Problemet filluan në qershor 2012, kur revista shkencore Nature, tha se kishte dokumente të një informatori që tregonin se pjesë nga teza e doktoraturës së Pontas ishin identike me materialet e monografive të shkruara nga studiues të tjerë rumunë të ligjit.
Çështja bëri bujë pasi Ponta u bë kryeministër.
Menjëherë pas kësaj, dy organe shkencore u ngarkuan me detyrën e kontrollit të autenticitetit të veprave shkencore dhe konfirmuan raportin, duke kërkuar kështu anulimin e doktoraturës së tij.
Megjithatë, në korrik 2012, Këshilli Kombëtar i Etikës, një panel i Ministrisë së Arsimit, lajmëroi se Ponta nuk bëri plagjiaturë në doktoraturën e tij dhe tha se e kishte shkruar atë sipas standardeve akademike të kohës.
Ponta, pranoi se i vetmi gabim në tezën e tij ishte se nuk kishte përmendur të gjithë burimet në bibliografi dhe këmbënguli se akuzat ishin orkestruar nga rivali i tij presidenti Traian Basescu.
Në maj 2014, Gjykata e Lartë Rumune vendosi që Ponta të mos hetohej për plagjiaturë.
Etika e pakët kulturore në sistemin arsimor të Rumanisë është reflektuar në skandale të tjera plagjiaturash të nivelit të lartë.
Në maj 2012, ministri i arsimit, Ioan Mang, dha dorëheqjen si rezultat i një debati për plagjiaturë në diplomën e tij shkencore.
