Studentët maqedonas paralajmërojnë një tjetër protestë ose një bojkot të mundshëm të orëve të mësimit pasi Ministria e Arsimit nuk i mori parasysh kërkesat e tyre për të anuluar provimet shtetërore.
Organizata e studentëve të Maqedonisë, Plenumi i Studentëve, ka lajmëruar për veprime të reja kundër planeve të qeverisë për të prezantuar testim të jashtëm për të diplomuarit, pasi u bë e qartë se qeveria nuk do të hiqte dorë nga plani.
“Ministria vazhdon të shpërfilli argumentet tona. Duke vepruar kështu, ajo na detyron të ndërmarrim masa jo-institucionale. Po mendojmë të bojkotojmë orët ose të fillojmë protesta të tjera,” tha për BIRN Hristijan Davidovic një nga organizatorët e lëvizjes studentore.
Plenumi i ka bërë thirrje presidentit Gjorge Ivanov të mbështesë kërkesat e tyre, veçanërisht për faktin se ai ishte një profesor i universitetit. Megjithatë, Ivanov nuk ka dhënë deklaratë.
Javën e shkuar, mbi 12 mijë studentë kundërshtuan provimet e jashtme dhe morën pjesë në protestën më të madhe studentore që ka ndodhur në Maqedoni gjatë këtyre dekadave.
Studentët, kryesisht nga Universiteti Shën Kirili dhe Metodi i Shkupit, thanë se ndryshimet e planifikuara ishin antikushtetuese dhe një kërcënim për autonominë e universitetit.
Qeveria e Nikola Gruevskit, megjithatë, tha se sistemi i ri i provimeve për të diplomuarit do të përmirësojë cilësinë e edukimit dhe nuk do të cenojë autonominë e universiteteve.
Ministrat kanë pretenduar gjithashtu se Social Demokratët në opozitë fshihen pas protestave.
Ndërkohë, numri i universiteteve dhe fakulteteve, organet qeverisëse të së cilave kanë refuzuar planin e qeverisë është rritur.
Fakulteti Juridik i Shkupit, Fakulteti i Arteve Dramatike, Fakulteti i Filologjisë dhe Fakulteti i Pedagogjisë, si dhe Universiteti privat FON janë vetëm disa nga trupat e arsimit të lartë që kanë refuzuar testet shtetërore, duke argumentuar se nuk do të ishin në dobi të edukimit të studentit, siç pretendojnë autoritetet.
