Seanca dëgjimore me përfaqësues të shoqërisë civile dhe ambientalistë për hidrocentralin e Lengaricës zhgënjeu pritshmëritë për gjetjen e një zgjidhjeje që shpëton pasuritë natyrore të mbrojtura me ligj.
Përfaqësues të shoqërisë civile dhe ambientalistë të vendit kërkuan aleancë me deputetët e Kuvendit për anulimin e kontratës së hidrocentralit të Lengaricës në Përmet, të cilën e konsiderojnë të paligjshme. Por pritshmëritë e tyre u zhgënjyen, pas seancës dëgjimore që zgjati më shumë se 2 orë në Komisionin e Veprimtarisë Prodhuese.
Ambientalistët Sazan Guri e Lavdosh Ferruni, profesori Alfred Frashëri dhe aktivisti Ilia Kondi renditën para Komisionit arsyet që e bëjnë licensën e HEC-it të paligjshme si dhe shpjeguan dëmet që ky ndërtim mund t’i shkaktojë Parkut Kombëtar të Hotovës, kanionit, ujërave termale të Bënjës dhe shpellave mijëvjeçare.
“HEC-i i Lengaricës është një ndër çibanët modernë, që po lulëzon në kundërshtim të hapur me ligjin duke rrezikuar pasuritë kombëtare dhe dëmtuar perspektivën afatgjatë të komunitetit përmetar dhe turistëve të huaj,” tha për BIRN-in Kondi Ilia, njëri prej aktivistëve të hershëm kundër HEC-it që po ndërtohet në zemër të Parkut Kombëtar.
Ai shpjegon se paraqitën dhjetra prova para komisionit të drejtuar nga deputeti socialist, Eduart Shalsi, por në fund të seancës mungoi një propozim konkret mbi shqetësimet e ngritura prej tyre.
Hidrocentrali i Lengaricës po ndërtohet nga kompania austriake Enso Hydro në Parkun Kombëtar të Përmetit, pasi u pajis me licensë dhe leje mjedisore nga qeveria e drejtuar prej ish-kryeministrit Sali Berisha.
Qeveria e majtë e Edi Ramës ngriti një Task Forcë për verifikimin e pretendimeve të shoqërisë civile pas ardhjes në pushtet, por në fund i dha dritën jeshile vazhdimit të punimeve.
Në një investigim të mëparshëm (linku), BIRN zbuloi përmes dokumenteve dhe intervistave me zyrtarë të ndryshëm se kompania austriake nuk duhej të ishte pajisur me leje mjedisore, për shkak të ndikimit negativ mbi kanionin e Lengaricës dhe Parkun Kombëtar të Hotovës, zona këto të mbrojtura me ligj.
Ambientalistët pretendojnë se ndërtimi i hidrocentralit u parapri nga një process korruptiv dhe u shoqërua me shkelje të Kushtetutës, të Vendimit të Këshillit të Ministrave dhe Ligjit për Zonat e Mbrojtura.
Komisioni i Veprimtarisë Prodhuese në Kuvend i ftoi ata të jepnin argumentet e tyre, por Kondi Ilia e quan formale dhe aspak zgjidhje seancën e mbajtur.
Ai thotë për BIRN-in se beteja për të shpëtuar pasuritë natyrore të Përmetit do të vazhdojë në dy shina; një padi penale për zyrtarët dhe ish-zyrtarët e përfshirë në çështjen Lengarica dhe lobim ndërkombëtar e protesta kundër asaj që shoqëria civile e quan aferë korruptive me pasoja të rënda për njërën prej zonave më të bukura në vend.
