Vdekja e dy marinarëve të rimorkiatorit “Iliria” rrit bilancin e tragjedisë në detin Adriatik. E ndërsa operacioni vazhdon, Prokuroria e Përgjithshme nis procedurat për sekuestrimin e tragetit dhe paisjeve të tij.
Dy marinarë shqiptarë humbën jetën mëngjesin e së martës gjatë operacionit të shpëtimit të anijes “Norman Atlantic”, duke rënduar bilancin e tragjedisë.
Edmond Hila, 57 vjeç dhe Petrit Jahja, 59 vjeç, marinarë të rimorkiatorit “Iliria” u plagosën rëndë, teksa po përpiqeshin të lidhnin me kavo anijen e tragjedisë, për ta zhvendosur më pas në drejtim të portit të Vlorës.
Operacioni shkoi keq, pasi kavot u këputën dhe goditën dy marinarët shqiptarë. Njëri prej tyre vdiq në vend, ndërsa i dyti një orë më vonë.
Ministria e Mbrojtjes deklaroi në një njoftim për mediat se Hila dhe Jahja nuk janë pjesë e Forcave të Armatosura. Viktimat ishin anëtarë të ekuipazhit të rimorkiatorit “Iliria”, i cili u kontraktua privatisht për tëheqjen e tragetit “Norman Atlantic”.
Më shumë se 48 orë pas lëshimit të alarmit SOS nga trageti i linjës Patras-Ankona, ekipet e operacionit të shpëtimit kanë evakuuar 470 persona që ndodheshin në bordin e anijes së përfshirë nga flakët.
Dhjetë persona në bord dyshohet se kanë humbur jetën, por informacionet për numrin e saktë të viktimave janë kontradiktore. Agjencia Reuters raporton se autoritetet greke dhe italiane janë duke kërkuar në det dhe në hangarin e tragetit, me frikën se shumë pasagjerë mungojnë ende.
Anija “Norman Atlantic” u përfshi nga flakët në orët e para të së dielës, duke vënë në rrezik 478 personat që ndodheshin në bord; pasagjerë dhe anëtarë të ekuipazhit. Operacioni për shpëtimin e tyre u vështirësua nga kushtet e këqija të motit.
Paralelisht me operacionin e shpëtimit të njerëzve, autoritetet e Greqisë, Italisë dhe Shqipërisë u kujdesën të ankoronin tragetin, pasi një hetim i nisur nga Prokuroria e Barit e kthen atë në një skenë krimi.
E ndërsa përpjekjet për rimorkimin e tragetit drejt brigjeve shqiptare vazhdojnë, Prokuroria e Përgjithshme ka marrë një letër-porosi për sekuestrimin e “Norman Atlantic”.
“Prokuroria shqiptare po krijon të gjitha lehtësirat proceduriale për t’u ardhur në ndihmë autoriteteve gjyqësore italiane, të cilat kanë nisur një hetim pas avarisë së rëndë në bordin e tragetit,” tha zëdhënësi i Prokurorit të Përgjithshëm.
Prokuroria e Barit u ka kërkuar të hënën autoriteteve shqiptare që të sekuestrojnë anijen dhe të gjitha paisjet që ndodhen në të, për llogari të hetimit që pritet të zbulojë shkaqet e plota të zjarrit, që vuri në rrezik jetën e qindra personave.