Derisa përgatisja përmbledhjen vjetore të kolegëve të mi të emisionit “Jeta në Kosovë” për atë se çfarë kishim raportuar, hulumtuar, analizuar e debatuar, e pashë që viti kishte qenë tepër i rëndë.
Vendi sapo kishte përfunduar një vit me zgjedhje lokale të mbajtura në fund të vitit 2013 dhe po hynte në një vit tjetër zgjedhor kur po planifikoheshin të mbaheshin zgjedhjet e përgjithshme për Parlament. Ky vit ka qenë viti më i rëndë politik në vend, viti i bllokadës 6 mujore të shtetit të Kosovës. Ky vit po ashtu ishte vit skandaleve të misionit të Bashkimit Evropian, EULEX. Po ashtu ishte viti i zbulimit të skandalit me SMS-të, pra viti i skandaleve të stentave. Vit i skandaleve në Universitetin Publik të Prishtinës, e vit i ikjes së kosovarëve.
Viti 2014 pos tjerash nisi me protesta të studentëve kundër rektorit të Universitetit të Prishtinës, Ibrahim Gashi. Ata protestonin kundër tij, si shenjë pakënaqësie për kredibilitetin e tij akademik. Protestuesit nga dera e rektoratit i hoqi vetëm dorëheqja e rektorit. Por, për dallim nga paraardhësi i tij, Ibrahim Gashi, protestat ndaj të cilit ishin për punime të dyshimta shkencore, protestat ndaj Ramadan Zejnullahut erdhën nga shoqatat e dala nga lufta e UÇK-së, të cilët kërkonin regjistrimin e pakusht të mbi 1 mijë fëmijëve të familjeve të këtyre kategorive. Ky problem, as sot e kësaj dite nuk është zgjidhur. Çfarë kontrasti – e nisëm vitin më një rektor që erdhi në UP si i dërguar politik dhe me presion qytetar u detyrua ta lëshojë postin, e tjetrit iu dorëzua një vendim politik të cilin nuk e respektoi dhe u përkrah nga qytetarët për të mos e lëshuar postin. A thua ishte ky shembulli i parë në Kosovë ku si njeri i politikës poshtërohesh e si profesionist kredibil mbështetesh nga opinioni publik?
Viti 2014 ishte vit kalendarik i zgjedhjeve të përgjithshme parlamentare. Ato u mbajtën me 8 qershor. Partitë politike para zgjedhjeve kishin vendosur premtime e parime të ndryshme për votuesit e tyre e madje disa nga këto kishin vendosur vija të kuqe se me kë do të bëjnë koalicion e me kë jo! Por vetëm dy ditë para zgjedhjeve të përgjithshme në Kosovë, më 6 qershor, në hapësirat e termocentralit “Kosova A” ndodhi një shpërthim i madh. Kjo tragjedi nxori në pah se gjendja e sigurisë në këtë termocentral është shumë e rrezikshme. Xhirimet ekskluzive u siguruan nga KALLXO.com. Pas datës 8 qershor, vendi kishte hyrë në krizë politike. Partia Demokratike e Kosovës, nuk po arrinte të gjente partner për të krijuar Qeverinë, në ndërkohë ishte formuar Blloku, pra koalicioni i partive LDK, AAK, NISMA, plus Lëvizja “Vetëvendosje”. Por LDK-ja e prishi marrëveshjen me bllokun dhe vendosi të shkojë me PDK (koalicionin me të cilën ishte zotuar që s’e bën kurrë) dhe Listën Serbe. Në dhjetor, pas 6 muajsh pa qeveri të vendit, pas prishjes së bllokut, pas deklaratës së ambasadores së Shteteve të Bashkuara të Amerikës, më në fund Kosova u bë me qeveri. Koalicioni i ri, PDK-LDK e zgjodhi ish shefin e ShIK-ut, Kadri Veselin, si kryeparlamentar dhe Isa Mustafën si kryeministër të vendit. Kjo për shumëkë nuk ishte e besueshme që kryeministri i deritashëm Hashim Thaçi do të lëshonte pe, e që LDK-ja do ta votonte ish shefin e ShIK-ut, Veseli si kryeparlamentar.Mirëpo ja që ndodhi.
Viti 2014 do të mbahet mend edhe për skandalet në misionin më të madh të Bashkimit Evropian, EULEX. Krejt kjo kishte nisur prokurorja e këtij misioni, Maria Bamieh, u suspendua nga puna për shkak të dyshimeve për zbulim të sekreteve të këtij misioni. Pas suspendimit, Maria Bamieh u hap për publikun. Bamieh foli edhe për pengesat në punë që tha t’i ketë pasur nga kryeprokurorja e EULEX-it, Jaroslava Novotna. Aryse tjetër, sipas prokurores Bamieh, ishte heshtja e EULEX-it për akuzat për përfshirje në korrupsion të gjykatësit Francesko Florit. Po këto akuza ishin mohuar nga Florit.
Viti 2014 do të mbahet mend edhe për pazaret me zemra në shëndetësi. Kardilogë të zemrës të spitaleve private e publike kishin mashtruar qytetarët e Kosovës se po u vendoseshin stenta në zemrat e tyre. Kjo në disa raste nuk kishte ndodhur, por as ishte nevoja. SMS-të e publikuar nga KALLXO.com, zbuluan këtë tragjedi të shëndetësisë në vend. Së fundi ky vit do të mbahet mend si vit i ikjes së madhe të kosovarëve nga vendi i tyre, të cilët edhe sot vazhdojnë të qëndrojnë nëpër kampe të ndryshme në Hungari, Austri, Francë e vende tjera të Evropës.
Megjithatë,në vitin 2014 nuk ka shkuar vetëm zi. T’i përmendim edhe disa momente krenarie për vendin tonë. Nuk e kam fjalën vetëm për fluturimin e dronit mbi stadiumin e Partizanit në Beograd, kur është zhvilluar ndeshja e futbollit për kualifikime evropiane ndërmjet Shqipërisë e Serbisë, por e arritur e madhe sportive është edhe mundësia që përfaqësuesja e Kosovës tash e tutje mund të zhvillojë ndeshje miqësore me kombëtare tjera. E arritur tjetër sportive është fakti se Majlinda Kelmendi jo vetëm që ka vërtetuar pozitën e saj si kampione e botës në xhudo por tash e tutje, Majlinda do ta përfaqësojë Kosovën edhe në Lojërat Olimpike. Kosova edhe zyrtarisht është bërë anëtare e Komitetit Olimpik Ndërkombëtar.
Pra, ndoshta kompanitë e agjencioneve turistike do të duhej të hapnin vija të reja për Rio 2016, jo për shkak të ikjes nga kushtet e vështira për jetë në Kosovë, por ngase Majlindës do t’i duhet përkrahja jonë për të vazhduar të jetë kampione e botës.
