Bashkimi Europian dënoi një deklaratë të kryeministrit të Serbisë Aleksandar Vuçiç i cili akuzoi se Rrjeti Ballkanik i Gazetarisë Investigative paguhet nga Brukseli për të publikuar gënjeshtra dhe për të dëmtuar qeverinë e tij.
Komisioni Europian tha të shtunën se hedh poshtë “pretendimet pa bazë” të kryeministrit të Serbisë se BIRN po financohet nga Brukseli për të përhapur gënjeshtra për të destabilizuar qeverinë e tij.
Maja Kocijancic, zëdhënëse për Komisionin Europian për politikën e fqinjësisë dhe bisedimet për zgjerim, tha se Brukseli qe “shumë i habitur nga pretendimet e kohëve të fundit të kryeministrit të Serbisë Vuçiç se BE-ja po paguan organizata të caktuara për të ndërmarrë një fushatë kundër qeverisë së Serbisë”.
“Ne hedhim poshtë me forcë këto pretendime të pabaza. Bashkimi Europian mbështet gazetarinë e pavarur dhe të guximshme si dhe lirinë e fjalës në të gjithë Europën dhe më tutje. Liria e shprehjes është parim bazë në demokraci,” tha Kocijancic.
“Bashkimi Europian pret që autoritetet e Serbisë të sigurojnë mjedis që mbështet lirinë e shprehjes dhe të medias. Kritikat e medias (si ato të BIRN) janë thelbësore për të siguruar llogaridhënien e përshtatshme të qeverive të zgjedhura; qeveritë në këmbim duhet të jenë të gatshme të veprojnë përballë kritikave të tilla në një mënyrë konstruktive dhe transparente në vend që të përpiqen ta shtypin atë,” shtoi ajo.
Vuçiç denoncoi të premten gazetarët e BIRN si “gënjeshtarë” mbi një investigim të tyre mbi kompaninë nën pronësi publike të energjisë Elektroprivreda Srbije, EPS.
“Është e rëndësishme për njerëzit që të dinë [kush e publikoi investigimin]… ata kanë marrë para nga z. Davenport [kreu i Delegacionit të Bashkimit Europian në Beograd Michael Davenport] dhe Bashkimi Europian për të folur kundër qeverisë së Serbisë,” tha Vuçiç në një konferencë për shtyp.
“Thuajini atyre gënjeshtarëve se kanë gënjyer sërish. Kjo është e gjitha çfarë kam për të thënë,” tha Vuçiç.
Vuçiç iu përgjigj të shtunën deklaratës së Kocijancic duke akuzuar zyrtaren e Brukselit se po përpiqet ta detyrojë të heshtë.
“Unë jam i tronditur nga fakti që Maja Kocijancic në emër të BE-së po përpiqet të më mbyllë gojën, të më ndalojë edhe t’i përgjigjem pyetjeve nga gazetarët,” tha Vuçiç në një letër për Kocijancic.
Vuçiç aludoi gjithashtu se BIRN po lobonte për kompani të huaja, emrat e të cilave nuk i tha, për të fituar një kontratë për rinovimin e minierës më të rëndësishme në Serbi.
“Ata që fituan grantet [e BE-së] duke ndjekur procedura strikte, u përpoqën të detyrojnë qeverinë e Serbisë të pranojë një ofertë nga një kompani perëndimore, e cila qe 23 milionë euro më e shtrenjtë se sa ofertat e një kompanie serbe,” tha ai.
Të enjten, BIRN publikoi një investigim mbi lajmin se si kompania publike Elektroprivreda Srbije, EPS, i dha kontratën për të rinovuar minierën Tamnava një konsorciumi që nuk kishte eksperiencë në punë të tillë, duke rritur në mënyrë domethënëse kostot.
Miniera Tamnava u përmbyt në maj dhe konsorciumi i udhëhequr nga kompania serbe Energotehnika – Juzna Backa u punësua për të nxjerrë ujin jashtë.
Hetimi i BIRN zbuloi se Juzna Backa qe lidhur me Nikola Petrovic, drejtori i një kompanie tjetër publike, Elektromreze Srbije dhe është bashkëpunëtor i ngushtë i kryeministrit Vuçiç.
Një ditë më pas, Vuçiç denoncoi reporterët e BIRN si “gënjeshtarë”.
Por Slobodan Georgijev nga BIRN Serbia i hodhi poshtë pretendimet e Vuçiç.
“Ne i qëndrojmë lajmit të publikuar. Lajmi ynë është 100 për qind i saktë, çdo gjë është e qartë, ne nuk publikojmë kurrë asgjë për të cilën nuk ka prova,” tha Georgijev.
Gordana Igric, drejtoresha rajonale e Rrjetit Ballkanik të Gazetarisë Investigative, ndërkohë tha se autoritetet po shënjestronin BIRN me shpifje të ngjashme me ato të kohës së regjimit të Sllobodan Millosheviç në vitet 1990.
“Kjo lloj propagande kundër medias së pavarur dhe kritike më kujton vitet 1990,” tha Igric.
“Fakti që kjo po ndodh sërish në një kohë që situata duhej të ishte krejt ndryshe shkakton konfuzion, për shkak se politika zyrtare e qeverisë së Serbisë është aspirata për t’u bashkuar me BE-në, ndërsa ajo varet rëndë nga ndihma financiare nga e njëjta BE,” tha ajo.
Shoqata e Gazetarëve të Pavarur të Serbisë, NUNS, lëshoi gjithashtu një deklaratë ku akuzon Vuçiç se po vendos nën presion BIRN dhe lirinë e medias në përgjithësi.
“Cilësimi i gazetarëve të BIRN si gënjeshtarë me akuzën se ata kanë marrë para për të “folur kundër qeverisë” është një fjalor që i përket të shkuarës dhe është i papranueshëm në një shoqëri demokratike dhe një shtet, për të cilin Vuçiç vetë shpsh thotë se dëshiron të bëhet pjesë e BE-së,” tha NUNS.