Një gjykatë e Rumanisë burgosi dy ish-ministra për dhënien e një informacioni sekret te kompanitë e huaja të ofertave për privatizimin e ndërmarrjeve të energjisë dhe telekomit.
Të martën gjykata e apelit të Rumanisë dënoi me burg ish-ministrin e ekonomisë Codrut Seres dhe ish-ministrin e telekomunikacioneve Zsolut Nagy për rolin e tyre në një grup krimi ndërkombëtar të përfshirë në privatizimin e disa kompanive.
Çështja u pa si test për aftësinë e Rumanisë për të dënuar korrupsionin në nivelin e latë.
Seres u burgos me katër vjet dhe tetë muaj për pjesëmarrje në grup dhe për zbulim të informacionit sekret, ndërsa Nagy mori katër vjet për dhënien e informacionit të kualifikuar te një grup i këshilltarëve ndërkombëtar.
Tetë persona të tjerë, përfshirë një çek, një bullgar dhe një qytetar turk, morën gjithashtu dënime me burg.
Prokurorët thanë se nga maji 2005 deri nëntor 2006 grupi dorëzoi informacione tregtare sekrete që më pas ia dhanë kompanive të huaja që bënë oferta për firmat shtetërore rumune të telekomit dhe energjisë.
Rumania konsiderohet ende një nga shtetet më të korruptuara në Bashkimin Europian dhe ka bërë progres të kufizuar në luftën ndaj korrupsionit dhe krimit të organizuar që kur iu bashkua BE-së në 2007.
Megjithatë, në vitet e fundit, numri i zyrtarëve të lartë të dënuar për ryshfet është rritur ndjeshëm.