Një helikopter i mbushur me 800 kg hashash është rrëzuar në Malaga të Spanjës, gjatë ndjekjes nga policia. Njëri prej pilotëve dyshohet se është Sokol Feka, instruktor i Bazës Ajrore të Farkës në Tiranë.
Një pilot shqiptar, major i Forcave të Armatosura dyshohet se ka humbur jetën teksa po transportonte 800 kilogramë hashash me helikopter nga Maroku në Spanjë. Ministria e Mbrojtjes konfirmoi se helikopteri me drogë është rrëzuar gjatë ndjekjes nga Guarda Civile e Spanjës dhe se njëri prej pilotëve ishte majori shqiptar, Sokol Feka.
Kryeministri Edi Rama ishte i pari që njoftoi implikimin e një piloti të ushtrisë shqiptare në këtë ngjarje. Ai tha se Ministria e Jashtme ishte vënë në dijeni se piloti i helikopterit me drogë ishte shqiptar dhe e quajti atë “një ndër pilotët më të besuar”.
Ministria e Mbrojtjes bëri me dije përmes një deklarate për mediat se rrëzimi i helikopterit me drogë ka ndodhur mëngjesin e së martës. “Si pasojë e rrëzimit të helikopterit, piloti ka vdekur. Bazuar në dokumentet e gjetura mendohet se ky person mund të jetë Sokol Feka, major, me detyrë instruktor të Bazën Ajrore të Farkës,” thuhet në njoftimin e Ministrisë së Mbrojtjes.
Sokol Feka është pjesë e Ushtrisë shqiptare që prej 18 vitesh dhe mban gradën major që në vitin 2009. Sipas Ministrisë së Mbrojtjes, ai kishte marrë lejen e zakonshme për periudhën 12-31 Janar, ndërsa dalja jashtë vendit konsiderohet shkelje.
“Ai nuk ka aplikuar për leje për të dalë jashtë vendit, duke shkelur rregullat e parashikuara në ligjin për Statusin e Ushtarakut,” tha Ministria e Mbrojtjes.
Autoritetet shqiptare e kanë të paqartë se kur majori Sokol Feka ka dalë nga Shqipëria, ndaj është kërkuar verifikimi i shpejtë i lëvizjeve të tij nga Ministria e Brendshme dhe Policia e Shtetit.
Helikopteri që po transportonte 800 kg hashash nga Maroku në Spanjë u rrëzua pas përplasjes me një shtyllë elektrike në zonën Cortes dela Frontera të Malagës, ndërsa po ndiqej nga Garda Civile Spanjolle. Mediat e huaja raportojnë se një pilot i dytë spanjoll ka humbur jetën në këtë përplasje.
Helikopteri ishte i lyer në ngjyrë të zezë, për të mos u diktuar dhe brenda tij u gjetën 800 kilogramë hashash, të ndara në më shumë se 30 pako.
