Papa Françesk njoftoi të dielën se do ta vizitojë Sarajevën, kryeqytetin e Bosnjës dhe Hercegovinës, me shpresë se do t’i rrisë përpjekjet drejt vëllazërisë në vendin i cili ka qenë i përshkuar nga lufta dy dekada më parë.
Lufta e viteve 1992-1995 mori më shumë se 100 mijë jetë njerëzish ndërsa hetimi i krimeve të luftës po vazhdon ende.
Françesku u tha dhjetra- mijëra besimtarëve që u mblodhën në sheshin e Shën Pjetrit në Vatikan këtë të diel se planifikon të shkojë në Sarajevë më 6 qershor.
Ai kërkoi lutje në mënyrë që vizita e ti njëditëshe ta inkurajojë komunitetin e vogël katolik në Bosnjë si dhe “ta rrisë zhvillimin për të mirë dhe të kontribuojë në konsolidimin e vëllazërisë dhe paqes, të dialogut ndërfetar dhe miqësisë”.
Ai është Papa i dytë që e viziton Sarajevën pasi që këtë për herë të parë e kishte bërë Papa Gjon Pali në vitin 1997. Gjon Pali u kthye sërish në këtë shtet në vitin 2003 në një udhëtim në qytetin e Banja Lukës.
Bosnja është shteti i dytë në Ballkan që viziton Papa Françesk. Qindra e mijëra shqiptarë morën rrugët e Tiranës me 21 shtator për të pritur Papën, i cili gjeti entuziazëm për mesazhin e tij të harmonisë ndër-fetare.
Vizita e parë evropiane e Papës Françesk I në Shqipëri, në një vend kryesisht mysliman me pakicë katolike, u pa nga shumëkush si reagim ndaj konflikteve sektare që sollën shpalljen e Shtetit Islamik të Irakut dhe Sirisë.
Gjatë vizitës, Papa Françesk u takua dhe shkëmbeu dhurata me përfaqësues të gjitha komuniteteve fetare të vendit dhe ngriti lart dialogun dhe respektin mes feve në Shqipëri. Qindra e mijëra njerëz ndoqën meshën e tij publike në Sheshin Nënë Tereza në Tiranë.
U bënë përpjekje madje të takonte dhe komunitetin hebre të vendit, por ata janë aq pak dhe të paorganizuar saqë nuk kanë as rabin.
Vetëm një e dhjeta e Shqipërisë është katolike. Në regjistrimin e fundit, në 2011, pak më shumë se gjysma e popullësisë u deklarua myslimane sunite ndërsa pjesa tjetër e popullsisë u nda mes ortodoksëve, sekteve sufi të dominuar nga bektashianët me shifra më të vogla të krishterësh evangjelistë apo ateistësh.
