Me anë të lëvizjes ‘Mbill pemën tënde’ disa aktivistë të shoqërisë civile po mundohen t’i ndërgjegjësojnë qytetarët që të gjelbërojnë zonat e ndotura.
Të motivuar nga pjesëmarrja e lartë e qytetarëve në aksionin për të mbjellë fidanë në landfillin e Sharrës, aktivistët e lëvizjes ‘Mbill pemën tënde,’ besojnë që pyllëzimi i zonës të ndotur është i mundur.
“Ne zgjodhëm landfillin e Sharrës sepse është një zonë me probleme të dukshme, është një zonë ku nuk mund të rrish pa bërë asgjë,” shprehet Elian Tanini, një prej organizatorëve.
“Një ditë dikush do ta marrë patjetër seriozisht këtë landfill. Puna është pse mos bëhen gjërat pak nga pak duke filluar që në ditët tona,” pyet ai.
Nëpërmjet një fushate ndërgjegjësimi në rrjetet sociale dhjetëra qytetar te Tiranës dhe përtej, u mblodhën të shtunën më 31 janar, duke mbledhur 2300 fidanë akacia, një numër i cili e ka tejkaluar pritshmërinë fillestare të organizatorëve.
Aksionet e mëparshme të kësaj lëvizje dhe shija e mirë që kanë arritur të përcjellin bëri të mundur mbledhjen e shumë të rinjve të ardhur nga shkolla të ndryshme të kryeqytetit, grupime apo organizata të tjera.
“Kam patur përshtypjen që në Shqipëri nuk funksionon siç duhet aktivizmi qytetar. Dua të them që roli i shoqërisë civile është i vogël. Sot kam ndryshuar tërësisht mendim,” u shpreh Ivan, një student Italian që mori pjesë në aksionin e mbjelljes së pemëve.
Tanini thotë se aksionet e ardhshme të lëvizjes do synojnë të përhapen në zona të tjera me problematike të theksuara mjedisore.
“Tani jemi duke punuar edhe me vëzhgimin e një zone tejet problematike në Shqipëri. Kjo zonë është ëndrra jonë për ta gjelbëruar, madje thirrja jonë vitin e ardhshëm do të jetë vetëm për të,” tha ia.
“Çdo qytetar e ka mundësinë t’i shërbejë vetë mjedisit,” Tanini përfundoi.
