Katër persona, përfshirë kunatin e kryeministrit, janë arrestuar për akuza të përvetësimit të fondeve europiane, teksa lufta e Rumanisë ndaj korrupsionit vazhdon.
Hetuesit rumunë anti-korrupsion të mërkurën akuzuan Iulian Hertanu, kunatin e kryeministrit Viktor Ponta, së bashku me tre biznesmenë të tjerë për krijimin e një grupi të organizuar krimi që përvetësuan fondet e BE-së për një projekt zhvillimi.
Prokurorët thonë se një grup kompanish, përfshirë një të zotëruar nga Hertanu, ishin të përfshira në modernizimin e sistemit të ujërave të zeza në Comarnic, një qytet 125 km në veri të Bukureshtit – por rreth 1.75 milionë euro ose 54 për qind e fondeve të BE-së u përdorën për qëllime të tjera. Hertanu ka refuzuar të komentojë.
Në të njëjtin çast, prokurorët po hetojnë të tjerë persona – përfshirë kryetarin e këshillit vendor të Prahovas dhe dy anëtarë të parlamentit – të akuzuar për mbështetje të aktiviteteve të grupit kriminal.
Çështja është e dyta e lidhur me familjen e kryeministrit. Vitin e shkuar, prokurorët filluan një hetim për Ilie Sarbu, një senator dhe vjehrri i Pontas, në një çështje të lidhur me riprivatizimin e pyjeve të zaptuara nga regjimi komunist. Vetë Ponta nuk është akuzuar për përfshirje në ndonjë prej çështjeve.
Rumania konsiderohet ende një nga shtetet më të korruptuara në Bashkimin Europian, të cilit iu bashkëngjit në 2007.
Megjithatë, nën presion nga BE-ja, gjykata kanë shtuar luftën kundër korrupsionit në vitet e shkuara. Numri i të dënuarve për ryshfet të nivelit të lartë u rrit nga 155 në 2006 në mbi 1,000 në 2013, sipas të dhënave zyrtare.
