Protestuesit bënë përsëri thirrje që ministri maqedonas i shëndetësisë të japë dorëheqjen për rastin e vdekjes së vajzës 9-vjeçare që priste miratim të fondeve për operacion jashtë shtetit
Rreth një mijë njerëz mbajtën një protestë në mesditën e së martës në Shkup duke kërkuar dorëheqjen e ministrit të shëndetësisë, Nikola Todorov, për vdekjen e 9-vjeçares Tamara Dimovska.
Me sloganin “karton të kuq për ministrin Todorov”, protestuesit kërkuan dorëheqjen sepse vajza vdiq teksa priste që Fondi Shëndetësor të vendoste nëse do të paguante apo jo për mjekimin e saj në Turqi me një kosto 30,000 euro.
Marshimi u organizua në rrjetet sociale dhe u mbështet nga grupet e shoqërisë civile, përfshirë Komitetin e Helsinkit pët të drejtat e njeriut në Maqedoni.
Maja Parnadzieva-Zmejkova, një nga drejtoret e Fondit Shëndetësor, dorëheqjen të së cilës e kërkonin edhe protestuesit, dha dorëheqjen përpara protestës të martën.
Protestuesit kërkojnë dorëheqjen e një tjetër drejtori në Fondin e Shëndetit, Xhemali Mehazi, dhe të anëtarëve të komitetit të doktorëve që mohuan miratimin e pagesës.
Komiteti i Helsinkit ka ngritur akuza kundër Todorov për abuzim me pushtetin dhe autoritetin për çështjen të premten. Në të thuhet se 20 ditë para vdekjes, Todorov tha se Ministria e Shëndetësisë dhe Fondi Shëndetësor do të mbulonte kostot e mjekimit.
“Me këtë deklaratë ai mashtroi publikun dhe familjen e vajzës me informacion se shteti do të paguante për trajtim. Ai nuk ka asnjë autoritet ligjor për ta bërë këtë,” tha presidentja e Komitetit të Helsinkit, Uranija Pirovska për BIRN të premten.
Të enjten e shkuar, platforma e qytetarëve, Ajde, organizoi një protestë përpara ministrisë së shëndetësisë, duke mbajtur maska të bardha dhe rroba të zeza për të kërkuar në mënyrë simbolike përgjegjësi për vdekjen e Tamarës.
Vajza vdiq më 9 shkurt. Ajo vuante nga një deformim i shpinës dhe vdiq duke pritur miratimin për mbulimin e kostos së mjekimit. Dy vite më parë ajo bëri operacionin e parë dhe familja e saj po numëronte ditët derisa t’i lejohej një operacion i dytë jashtë shtetit.
Ministri i Shëndetësisë më herët u shpreh se ai nuk ishte personi që zvarriti procesin e miratimit.
“Kur dëgjova rreth kësaj çështje, u trondita dhe i kërkova Drejtorisë së Fondeve të zotohej dhe ne i gjetëm fondet e duhura,” tha Todorov një ditë pas vdekjes së Tamarës.
Ai shtoi se operacioni ishte planifikuar për 8 ose 9 shkurt por fatkeqësisht ajo nuk jetoi.