Të ardhurat e dobëta nga Tatimi mbi Fitimin dhe Tatimi mbi të Ardhurat Personale goditën financat e qeverisë, por shpenzimet u mbajtën gjithashtu të ulëta, bëhet e ditur nga bilanci paraprak i publikuar nga Ministria e Financave.
Të ardhurat e përgjithshme të buxhetit të shtetit pësuan një rënie prej 3.3 për qind në janar të këtij viti në krahasim me janarin 2014, ndërkohë që shpenzimet u reduktuan me 7.4 për qind, bëhet e ditur nga raporti mujor paraprak i publikuar nga Ministria e Financave. Të ardhurat prej 26,4 miliardë lekësh qenë edhe më të ulëta se sa të ardhurat e realizuara në janar të vitit 2013, por kjo rënie nuk duket se përbën tendencë. Të ardhurat nga Tatimi mbi Vlerën e Shtuar vijuan të rriten me ritëm vjetor 10 për qind, gjë që reflekton rritjen e TVSH-së reale të mbledhura nga mallrat e rëndësishëm si karburant dhe cigare si pasojë e rritjes së taksës së qarkullimit dhe akcizës, të cilat hynë në fuqi nga 1 janari i këtij viti. Por të ardhurat nga Tatimi mbi Fitimin, i cili mblidhet nga Drejtoria e Përgjithshme e Tatimeve kanë me 61 për qind ndërsa të ardhurat nga tatimi mbi të ardhurat personale ranë me 25.3 për qind. Tatimi mbi të ardhurat personale u rrit nga 10 në 15 për qind duke filluar nga 1 janari 2015.
Shpenzimet e qeverisë gjatë janarit ranë me 7.4 për qind në 23.1 miliardë lekë, udhëhequr nga shpenzimet korrente.
Luhatja e të ardhurave në rritje apo në rënie nga një muaj në tjetrin është e zakonshme për buxhetin e Shqipërisë për shkak të peshës specifike të faktorëve të ndryshëm.
Buxheti i shtetit parashikohet të sigurojë 414 miliardë lekë të ardhura gjatë këtij viti (2.95 miliardë euro) me një rritje prej 47 miliardë lekësh ose 13 për qind në krahasim me vitin 2014. Këto të ardhura parashikohet të sigurohen në rreth 16 miliardë lekë nga taksat e reja që hynë në fuqi më 1 janar, rreth 10 miliardë nga rritja ekonomike si dhe pjesa tjetër nga lufta kundër evazionit fiskal.
Bilanci i përgjithshëm i muajit janar u mbyll me një suficit prej 3.3 miliardë lekësh, suficit ky më i lartë se sa në janar 2014.