Pas përjashtimit nga Partia Socialiste, deputeti Tom Doshi akuzon Ilir Metën se ka urdhëruar vrasjen e tij dhe kryeministrin Edi Rama se ishte në dijeni të këtij fakti.
Mazhoranca e majtë tronditet nga akuzat për vrasje politike, të ngritura nga deputeti i Shkodrës, Tom Doshi pas një mbledhjeje të grupit parlamentar të Partisë Socialiste ku u vendos përjashtimi i tij.
“Edi Rama ka sot një tutor që është Ilir Meta, i cili ka urdhëruar vrasjen time dhe të Mhill Fufit( deputet i PD),” tha Doshi pas përjashtimit nga Partia.
“Kam 5 muaj që ia kam bërë të qartë Ramës dhe Metës, por edhe Prokurorit të Përgjithshëm dhe atij të Krimeve të Rënda,” shtoi ai.
Deputeti i qarkut të Shkodrës, Tom Doshi ndante prej kohësh marrëdhënie të acaruara me kryeministrin dhe kryetarin e Partisë Socialiste, Edi Rama. Ky konflikt i ngritur mbi arsye të errëta për publikun, shpërtheu të enjten e kaluar para kamerave në Kuvend. Doshi u fotografua duke kërcënuar me gjeste kryeministrin Edi Rama, ndërsa ky i fundit shmangu çdo reagim ndaj tij.
Në seancën e së enjtes, deputeti Doshi paralajmëroi furtunën që kishte nisur me kohë brenda së majtës. “Në qoftë se unë flas, do të tronditën themelet e kësaj mazhorance,” tha ai për mediat.
Kryeministri Edi Rama shmangu komentet publike rreth akuzave të Doshit dhe lajmëroi një mbledhje të grupit parlamentar, për të marrë një vendim mbi fatin e mëtejshëm të deputetit që e kishte kërcënuar.
Në mbledhjen me dyer të mbyllura të Grupit Parlamentar të PS, Rama mësohet se ka deklaruar që bashkëjetesa e tij me Tom Doshin është e pamundur. Deputeti “rebel” ka braktisur mbledhjen dhe në ambientet e jashtme të selisë së PS pranoi se ishte përjashtuar nga Partia.
Gjatë një fjalimi të mbajtur gjatë mbledhjes, i cili u zbardh në faqen në Facebook të kryeministrit, Rama nënvizoi se qëndrimet publike të Doshit bien ndesh me normat më elementare të kontratës së bashkëjetesës brenda grupit parlamentar të PS.
“Nëse qëndrimi i deputetit do të kishte prekur thjesht personin dhe dinjitetin e personit tim, unë sot do të kisha kërkuar mirëkuptimin tuaj për të mos mbajtur qëndrim të prerë ndaj tij. Por me akuzat e tij deputeti ka shkuar përtej personit tim dhe ka cënuar rëndë dinjitetin e këtij grupi e të kësaj qeverie,” është shprehur Rama.
“Prandaj, unë kam bindjen se sot ne duhet t’i japim Tomës mundësinë të lirohet nga barra e kontratës që ka me grupin e me Partinë Socialiste, dhe të shkojë të provojë në rrugë ligjore vërtetësinë e akuzave të tij të papranueshme në adresë të qeverisë e të shumicës sonë parlamentare,” shtoi ai.
Duke folur pas mbledhjes së grupit parlamentar, kritiku i Ramës brenda PS, deputeti Ben Blushi, u shpreh që kryeministri mbante përgjegjësitë e tij për çarjen me Doshin.
“Historia Rama-Doshi është ajo e dy shokëve të ngushtë, që patën një konflikt për arsye që ne nuk i dimë. Kryetari Rama duhej ta administronte këtë gjë prej kohësh,” tha Blushi pas mbledhjes së Partisë Socialiste.
“Konflikti mes dy shokëve të ngushtë nuk ishte për arsye politike,” shtoi ai.
Akuzat direkte të Tom Doshit kundër Edi Ramës dhe aleatit të tij të LSI, Ilir Meta pritet të shoqërohen me debate dhe tension brenda mazhorancës dhe skenës politike shqiptare.
Kryetari i Kuvendit, i akuzuar nga Tom Doshi se kishte tentuar eliminimin e tij fizik nuk ka reaguar ende.
o Tom Doshi xxxxxx rames dhe metes se te dy jan strucaa njeri vjedh floririn tjetri vjedh popullin meqe ka mar postin ne dore
Tomi si tomka dhe shoket e tij ……shko ore XXXXX mashtrus ordiner