Kryeministri Edi Rama u takua të dielën me kreun e Lëvizjes Socialiste për Integrim, Ilir Meta, ku a ra dakord që partneri qeverisës i PS-së të marrë një të katërtën e kandidaturave për kryebashkiakë në zgjedhjet vendore.
“Dua të shpreh kënaqësinë për bashkëpunimin mjaft konstruktiv që kemi pasur gjer më tani dhe që do të vazhdojë të jetë akoma edhe më konstruktiv deri në 21 qershor, ditën e zgjedhjeve vendore,” u shpreh Meta pas takimit.
“Kandidatët janë dhe do të jenë të përbashkët dhe do të përzgjidhen me konsensus … ku natyrisht do të përpiqemi që të jemi sa më të vëmendshëm edhe për të përmirësuar raportin e përfaqësimit gjinor edhe në këtë drejtim për të sjellë sa më shumë gra dhe vajza përfaqësuese në drejtimin e bashkive të ardhshme,” Meta shtoi.
Të pranishëm në takim ishin dhe kryetarët e dy grupeve parlamentare, Gramoz Ruçi për PS-në dhe Petrit Vasili për LSI-në.
Pas takimit, z. Ilir Meta dhe z. Edi Rama bënë të ditur për mediat arritjen e marrëveshjes ku në 15 nga 61 bashki do të garojnë kandidatura të propozuara nga Lëvizja Socialiste për Integrim.
Bashkitë që do kenë kandidatë të LSI-se janë Berati, Lezha, Kukësi, Gjirokastra, Pogradeci, Skrapari, Vora, Bulqiza, Kuçova, Cërriku, Mallakastra, Delvina, Prrenjasi, Selenica, dhe Kolonja
Rama i tha medias që gjatë takimit të së dielës, PS dhe LSI kishin rënë dakord që të mbështesnin kandidatë të përbashkët në bazë të një formule të re.
“Ishte një takim për të finalizuar fazën e parë të procesit. Kemi konkluduar në parim që në zgjedhjet e 21 qershorit do paraqitemi me kandidatë të përbashkët,” u shpreh Rama
“Do të ecim me një formulë të re, çdo njëra nga partitë do të ketë të drejtën e propozimit për një numër njësish dhe të drejtën për të dhënë votën për dakordësinë ose jo të kandidatëve. Më pas do të vijojmë me shoshitjen e kandidaturave. Do të bëhen propozimet dhe do shikohen,” shtoi ai.
