Në një deklaratë në përvjetorin e shtatë të tragjedisë së Gërdecit ministri i brendshëm Saimir Tahiri është shprehur se maxhoranca e qendrës së majtë nuk është përgjegjëse për zbardhjen e ngjarjes.
“Kush mendon qe edhe kjo është përgjegjësi e maxhorancës, le te kuptojë se është vetëm prokuroria dhe gjykata që mund të veproje për këtë çështje,” u shpreh Tahiri nëpërmjet një deklarate në rrjetin social Facebook.
“Reforma ne drejtësi është angazhim i maxhorancës, e kjo po ndodh me shpejtësi, që të tilla gjëra të mos ndodhin kurrë në të ardhmen,” shtoi ai.
Shpërthimi i 15 marsit 2008 në fabrikën e demontimit të municioneve në Gërdec shkaktoi 26 të vrarë, por askush nuk u dënua për vrasjen e tyre.
Procesi penal ndaj 28 të pandehurve, drejtues të kompanisë Albademil dhe ish-zyrtarë të lartë të Ushtrisë dhe Ministrisë së Mbrojtjes u mbyll me dënime minimale.
Ish-ministri i Mbrojtjes, Fatmir Mediu i shpëtoi procesit falë imunitetit si deputet. E kur parlamenti vendosi heqjen e imunitetit për të zgjedhurit e tij, Prokuroria nuk e rihapi më çështjen.
Tahiri u shpreh se përvjetori i shtatë i shpërthimit në Gërdec ishte një ‘ditë e zezë’ për drejtësinë, pasi të dyshuarit kryesor të ngjarjes nuk ishin hetuar dhe gjykuar nga gjykata dhe prokuroria.
“Fëmijë, gra e burra të vrarë nga babëzia për fitim. Vite dënim më pak se numri i jetëve të humbura,” tha ai.
“Ish Ministri Mbrojtjes vijon të mos gjykohet sepse rifitoi mandatin e deputetit, dmth. imunitetin. Skandal që vazhdon, deri në kufijtë e mosveprimit kriminal nga drejtësia,” Tahiri shtoi.
