Gjashtë nga nëntë të akuzuarit për rekrutimin e mbi 70 besimtarëve myslimanë për luftën e Sirisë u paraqitën në Gjykatë pa avokat: Na mbron Allahu!
Gjykata e Krimeve të Rënda në Tiranë nisi seancën e parë gjyqësore kundër nëntë të akuzuarve për rekrutimin e mbi 70 besimtarëve shqiptarë në luftën e Sirisë, nën masa të rrepta sigurie. Mes të akuzuarve janë edhe dy imamët e vetëshpallur, Genci Balla dhe Bujar Hysa, të cilët konsiderohen nga Prokuroria si drejtuesit e rrjetit rekrutues.
Para fillimit të seancës, dhjetra familjarë dhe besimtarë të linjës së ashpër salafi u mblodhën tek Gjykata e Krimeve të Rënda. Ata u kontrolluan imtësisht nga forcat e Antiterrorit dhe u lejuan të hynin në sallën e gjyqit, vetëm pasi dorëzuan telefonët dhe sendet metalike që kishin me vete.
Nga nëntë të akuzuarit e kësaj çështjeje, vetëm 3 prej tyre përfaqësoheshin nga avokatët në sallën e gjyqit.
“Na mbron Allahu,” u përgjigjën të akuzuarit para trupit gjykues.
Seanca e shkurtër gjyqësore u shoqërua me tension, pasi as të akuzuarit dhe as familjarët e tyre nuk zbatuan rregullat e gjykatës. Ndryshe nga sa e kërkon procedura, ata nuk u ngritën në këmbë kur në sallë hyri trupi gjykues.
Prokuroria e Krimeve të Rënda akuzon imamët Genci Balla dhe Bujar Hysa dhe shtatë mbështetësit e tyre për thirrje për pjesmarrje në akte terroriste dhe nxitje të urrejtjes fetare. Përgjatë viteve 2012-2014, grupi i drejtuar nga dy imamët akuzohet se ka rekrutuar mbi 70 besimtarë myslimanë dhe i ka dërguar ata si luftëtarë në konfliktin sirian.
Megjithatë, séanca e djeshme zgjati vetëm pak minuta, pasi tre avokatët e të akuzuarve kërkuan të njihen me aktet e dosjes. Gjykata e Krimeve të Rënda e miratoi këtë kërkesë.
Në dosjen voluminoze të hetimit 1-vjeçar gjenden përgjime ambientale, përgjime telefonike, dëshmi të luftëtarëve të kthyer nga Siria dhe një aktivitet i dendur në rrjetet sociale, përmes të cilave vërtetohet se të pandehurit kanë bërë thirrje për xhihad dhe kanë mbështetur personat e gatshëm për t’u përfshirë në konflikt.
Nëntë të akuzuarit për rekrutim të “ushtarëve” të Kalifatit kishin role të ndara në aktivitetin e tyre përgjatë viteve 2012-2014. Genci Balla dhe Bujar Hysa akuzohen se përmes propagandës fetare, frymëzuan mbi 70 shqiptarë, ndjekës të rrymës tekfiriste dhe salafiste të islamit për t’u përfshirë në këtë konflikt.
Gjatë hetimit 1-vjeçar, Prokuroria e Krimeve të Rënda ka gjetur fakte kundër 21 personave, të cilët rezultojnë të përfshirë në rekrutimin e xhihadistëve shqiptarë në konfliktin sirian. Por akuzat për 12 prej tyre janë ndarë në një dosje më vete, pasi mendohet se këta persona ndodhen aktualisht në Siri, duke luftuar përkrah militantëve të ISIS.
