Të frymëzuar nga suksesi i protestave të studentëve, gjimnazistët maqedonas do të dalin në rrugë për të kërkuar ndryshim të kursit në arsim.
Duke ndjekur hapat e kolegëve të tyre më të mëdhenj në universitete të cilët ia dolën me sukses t’i rebeloheshin planeve qeveritare për provime të jashtme shtetërore, gjimnazistët në Maqedoni, të bashkuar në një lëvizje të quajtur “Plenumi i Gjimnazit”, lajmëruan protestën e tyre të enjten në Shkup.
Nën moton “Stop Reformave të Këqija në Arsim”, Nxënësit planifikojnë të marshojnë nga parku i kryeqytetit drejt Ministrisë së Arsimit në qendër të qytetit.
Janë lajmëruar edhe marshime të tjera paralele në qytete të tjera.
Nxënësit duan të ndalojnë planet për provime të jashtme diplomimi të kontrolluara nga shteti, të cilat kanë si qëllim kontrollin e aftësive të tyre dhe vlerësimit nëse mësuesit e kanë bërë punën e tyre. Ata gjithashtu duan të heqin provimet shtesë të parashikuara në matematikë pasi thonë se krijojnë një barrë të pamundur.
“Duam të hiqen provimet e jashtme… Nuk shohim qëllim të këtij koncepti,” tha Teano Kardula, nga Plenum i Gjimnazistëve.
Përgatitjet për protesta kanë tërhequr një kundër-fushatë armiqësore. Postera nga autorë të panjohur janë vendosur përpara shumë gjimnazeve, për t’i paralajmëruar nxënësit që të mos protestojnë.
“Për një eksperiment ata donin minj. Mos lejoni të eksperimentojnë me ju si Soros me mua,” shkruante një poster.
Mesazhi jehon rrëfimin e partisë qeverisëse VMRO DPMNE, që prej kohësh ka bërë fushatë kundër të ashtuquajturve ‘Sorosoidë”, duke i portretizuar ata si mercenarë me interesa të huaja.
George Soros, manjati amerikan i biznesit i lindur në Hungari, është i njohur për mbështetjen e tij për kauzat liberale politike dhe lëvizjet nëpër Europën Qendrore dhe Juglindore.
Një tjetër poster lexonte: “Arsimi është arma më e fuqishme që lideri i opozitës Zaev po e keqpërdor kundër qeverisë”.
Në qytetin qendror të Veles, ku nxënësit mbajtën një protestë të vogël javën e shkuar, posterët e autorëve të panjohur akuzonin organizatorët se kishin marrë secili nga 160 euro shpërblim nga Sorosi për protestën.
Nxënësit thonë se nuk do të frikësohen. “Plenumi i Gjimnazit dënon këto abuzimeve patologjike kundër gjimnazistëve të cilat synojnë të na parandalojnë nga lufta jonë. Ne themi haptazi se ata që ushtrojnë presion mbi nxënësit nuk do t’ia dalin të heshtin luftën tonë për arsim dhe të ardhme më të mirë,” u përgjigj plenumi.
Lëvizja e nxënësve po ndjek shembullin e Plenumit të Studentëve, që lajmëroi disa protesta në dhjetor kundër ligjit të arsimit të lartë që parashikonte provime të jashtme. Protestuesit thanë se plani ishte jokushtetues, se dhunonte autonominë e universitetit dhe krijonte vend për abuzim.
Pas zaptimit të fakulteteve nga studentët, Ministria e Arsimit u detyrua të tërhiqte ligjin dhe të premtonte procedura transparente për hartimin e të riut.
