Këshilli i Mandateve dështoi t’i jepte një përgjigje të hënën kërkesës së Prokurorisë për arrestimin e deputetëve Tom Doshi dhe Mark Frroku, duke e shtyrë ballafaqimin e palëve me dy ditë.
Këshilli i Mandateve në Kuvendin e Shqipërisë vendosi të shtyjë për të mërkurën shqyrtimin e kërkesës së Prokurorisë për arrestimin e deputetëve Tom Doshi dhe Mark Frroku.
Deputetët Doshi dhe Frroku rrezikojnë arrestimin, pas akuzave të ngritura nga Prokuroria se kanë dhënë dëshmi të rreme dhe kanë sajuar historinë e një atentati të paguar nga kryetari i Kuvendit, Ilir Meta.
Asnjë prej deputetëve nuk ishte i pranishëm në mbledhjen e paralajmëruar të Këshillit të Mandateve, ndërsa avokati i Doshit, Vladimir Meçe paraqiti një raport mjekësor për klientin e tij. Gjithashtu, avokati i Doshit kërkoi 1 javë kohë për të përgatitur mbrojtjen e tij përballë argumenteve të Prokurorisë.
Këshilli i Mandateve e pranoi pjesërisht kërkesën e Doshit, duke vendosur që mbledhja të zhvillohet të mërkurën. Paralelisht me pretendimet e deputetit Doshi, Partia Demokratike kërkoi dje që mbledhja e së mërkurës të zhvillohej me dyer të hapura.
Pas përfundimit të mbledhjes në Këshillin e Mandateve, deputeti Eduard Halimi tha për mediat se kishte kërkuar një seancë të hapur, në funksion të transparencës.
“Praktika e deritanishme ka qenë që mbledhje të tilla të zhvillohen me dyer të hapura, në mënyrë që publiku të njihet me argumentet e palëve,” tha Halimi. “Ajo që po ndodh tani është mungesë e plotë transparence,” shtoi ai.
Prokuroria e Krimeve të Rënda i kërkoi të premten Kuvendit të autorizonte kërkesën për arrestimin e dy deputetëve Tom Doshi dhe Mark Frroku, pas hetimit 3-javor mbi deklaratat publike të zotit Doshi se kryetari i Kuvendit kishte paguar atentatin kundër tij.
Këshilli i Mandateve u mblodh të shtunën, por e shtyu shqyrtimin me dy ditë pas kërkesës së deputetit Doshi për t’u njohur me provat e Prokurorisë. E njëjta gjë ndodhi edhe të hënën, ndërsa mbledhja e së mërkurës pritet t’i japë një përgjigje kërkesës për autorizim të Prokurorisë.