Opozita pretendon me përgjimet e fundit se kryeministri maqedonas i kërkoi miliona euro kompanive që u kishte dhënë tenderat e dy rrugëve.
Në konferencën e 14 për shtyp të opozitës maqedonase të përkushtuar përgjimeve në Maqedoni, Social Demokratët publikuan përgjimet e atyre që pretendojnë se janë zërat e kryeministrit Gruevski dhe bashkëpunëtorëve të tij teksa diskutojnë ryshfete me vlerë miliona euro.
Disa biseda dëgjohen zërat e Gruevskit dhe ministrit të transportit Mile Janakieski teksa flasin për mënyrën si të zhvatin një shumë të madhe prej 25 milionë euro nga një kompani që është përzgjedhur tashmë për të ndërtuar dy shtrirje rruge.
Opozita tha se kosto e dy segmenteve të rrugëve nga Miladinovci në Shtip dhe nga Kërçova në Ohër, aktualisht në ndërtim me një kredi kineze prej 580 milionë euro, ishte fryrë enkas për të marrë përfitime të jashtëligjshme.
Sipas opozitës përgjimet zbulojnë si Gruevski, pas rregullimit të ndërtimit të segmentit të parë për 270 milionë euro, më vonë veproi me të njëjtën firmë për të ndërtuar një segment tjetër nga Kërçova në Ohër.
Zërat e dy zyrtarëve dëgjohen teksa diskutojnë një komision ilegal prej 5 për qind në kostot, ose 15-18 milionë euro, për aksin Kërçovë-Ohër dhe një total prej 25 milionë për dy segmentet e rrugës.
“Do ta pranojnë ata kaq shumë?” pyet zëri i Gruevskit. “Epo, nëse i themi, ata do të ndjekin të njëjtën analogji si më parë,” përgjigjet Janakieski. “Provo 15, shih si do të reagojnë dhe më pas më telefono,” vendos Gruevski.
Dy zërat duken të shqetësuar për ta mbajtur çështjen të fshehtë. “Ji i kujdesshëm… zgjidhi fjalët, që të mos ngatërrohemi nëse duan të na regjistrojnë,” i thotë zëri i Gruevskit Janakieskit.
Parlamenti maqedonas ratifikoi marrëveshjen për ndërtimin e dy akseve rrugore, të financuar nga borxhi kinez, më 25 tetor 2013. Ndërtimet filluan në shkurt 2014.
Lideri i Social Demokratëve, Zaev tha në konferencën e së enjtes se vetëm për aksin Kërçovë-Ohër, çmimi ishte vendosur përfundimisht në 373 milionë euro, që ishte 103 milionë euro më shumë sesa çmimi i propozuar në studimin e kryer nga Ndërmarrja Maqedonase për Ndërtimin dhe Mirëmbajtjen e Rrugëve.
Dy përgjime të tjera përfshijnë Gruevskin dhe Janakieskin teksa përgatiten për të manipuluar një tender për ndërtimin e hekurudhës nga Kumanova në Beljakovcë, pjesë e një plani më të gjerë për të lidhur hekurudhat në Maqedoni me ato të Bullgarisë fqinje.
Ndërtimi i linjës me vlerë 50 milionë euro filloi në mars 2014 dhe iu dha një kompanie gjermane.
SDSM ka akuzuar kryeministrin dhe liderin e partisë qeverisëse Gruevski se ka orkestruar mbikëqyrjen e 20,000 njerëzve.
SDSM thotë se e ka marrë materialin nga burimet brenda shërbimeve sekrete maqedonase. Gruevski ka këmbëngulur se përgjimet janë krijuar nga shërbime të huaja në bashkëpunim me opozitën që të destabilizojnë vendin.